გრძელდება საუბნო საარჩევნო კომისიების წევრთა ტრენინგები 2021 წლის 2 ოქტომბრის მუნიციპალიტეტის ორგანოთა არჩევნებისთვის.

ცესკოს სწავლების ცენტრის მიერ შემუშავებული საუბნო საარჩევნო კომისიების წევრთა ტრენინგების კონცეფციის შესაბამისად, IV ეტაპი ეთმობა საუბნო საარჩევნო კომისიების ხელმძღვანელი პირების (თავმჯდომარე, მოადგილე, მდივანი) გადამზადებას.

ინტენსიური სასწავლო პროგრამის ფარგლებში მონაწილეები მიიღებენ ინფორმაციას მათ კომპეტენციას მიკუთვნებულ შემდეგ ძირითად საკითხებზე:

• კომუნიკაცია-კოორდინაცია საოლქო საარჩევნო კომისიასთან (კენჭისყრის დღისთვის მისაღები საარჩევნო დოკუმენტაცია/ინვენტარი, კენჭისყრის ოთახის მოწყობა, არჩევნების უსაფრთხოების საკითხი, გადასატანი საარჩევნო ყუთის სიის შედგენა)
• კენჭისყრის დღეს საუბნო საარჩევნო კომისიის ხელმძღვანელი პირების საორგანიზაციო/საზედამხედველო ფუნქციები (საარჩევნო უბნის გახსნის, კენჭისყრის მიმდინარეობის, საარჩევნო უბნის დახურვის და ხმების დათვლა-შეჯამების პროცესში)
• ამომრჩეველთა მიერ ხმის მიცემის წესი (მათ შორის, ნების თავისუფალი გამოვლენისა და ხმის მიცემის ფარულობის პრინციპი), ამომრჩეველთა პერსონალური მონაცემების დაცვის საკითხები
• ფოტო-ვიდეოგადაღების რეგულაციები საარჩევნო უბანზე, მათ შორის, ხმის დათვლის პროცესის ვიდეოფიქსაციის წესი
• საუბნო საარჩევნო კომისიის კენჭისყრის შედეგების შემაჯამებელი ოქმების შედგენის ტექნიკა
• კენჭისყრის დღეს, კენჭისყრის შენობაში ეპიდემიოლოგიური პროტოკოლის დაცვის უზრუნველყოფის ღონისძიებები

ტრენინგი პრაქტიკულ სწავლებაზე დაფუძნებით წარიმართება, გათვალისწინებულია სხვადასხვა თემატური სავარჯიშოების შესრულება.

სასწავლო პროცესი პანდემიასთან დაკავშირებული ყველა რეკომენდაციის დაცვით მიმდინარეობს. სწავლების ცენტრის მიერ გადამზადებული ტრენერები IV ეტაპის ტრენინგების ჩატარებას უზრუნველყოფენ 12-15 სექტემბრის ჩათვლით პერიოდში. გრაფიკი ხელმისაწვდომია ბმულზე. მასში ცვლილებების განხორციელების შემთხვევაში, ინფორმაცია აისახება დაუყოვნებლივ.

საუბნო საარჩევნო კომისიების წევრთა III ეტაპის ტრენინგები 2021 წლის 7 - 10 სექტემბრის ჩათვლით პერიოდში განხორციელდა, მასში მონაწილეობა მიიღო 3633 საუბნო საარჩევნო კომისიის 14 451 წევრმა (შენიშვნა: მონაცემებში არ არის შეყვანილი N4 კრწანისის საარჩევნო ოლქში შემავალი საუბნო საარჩევნო კომისიების წევრების ტრენინგებზე დასწრების სტატისტიკა (საპილოტე პროექტის ფარგლებში მონაცემი ცალკე მუშავდება)). დეტალური სტატისტიკა იხილეთ ბმულზე