სსიპ საარჩევნო სისტემების განვითარების, რეფორმებისა და სწავლების ცენტრს ხარისხის მენეჯმენტის საერთაშორისო სტანდარტის ISO 9001:2015 სერტიფიკატი მიენიჭა, რითაც ორგანიზაციის საქმიანობის ეფექტიანობა და  მომხმარებლების მაღალი ხარისხის სერვისებით უზრუნველყოფა დადასტურდა.

სწავლების ცენტრმა ISO საერთაშორისო სტანდარტის მოთხოვნებთან შესაბამისობის შიდა აუდიტი, შპს „ისო კონსალტინგ“-თან თანამშრომლობით, წარმატებით გაიარა 2025 წლის ნოემბერში და ამავე წლის დეკემბერში საერთაშორისო ორგანიზაციის „LL-C Certification“ მიერ ჩატარებული სასერტიფიკაციო აუდიტის შედეგად მიიღო ISO 9001:2015 საერთაშორისო სერტიფიკატი.

საერთაშორისო აუდიტორებმა შეისწავლეს სწავლების ცენტრის ორგანიზაციული მართვის სისტემა და კონტექსტი, რომელიც უკავშირდება საარჩევნო ადმინისტრაციის მოხელეთა პროფესიული განათლების პროგრამების და სერტიფიცირების გამოცდების ჩატარებას, ამომრჩევლებისა და არჩევნებში ჩართული სხვა მხარეებისთვის მასშტაბური სწავლების-ინფორმირების პროექტების განხორციელებას.

აუდიტორულ დასკვნაში აღინიშნა, რომ სწავლების ცენტრი ახდენს ეფექტიანი შიდა მენეჯმენტის დემონსტრირებას, ჰყავს კვალიფიციური და კომპეტენტური გუნდი, სამუშაო პროცესები კარგად არის ორგანიზებული, დასტურდება საქმიანობების შედეგიანობა და ხარისხის მენეჯმენტის სისტემა სრულ შესაბამისობაშია ISO 9001:2015 საერთაშორისო სტანდარტის მოთხოვნებთან.

სწავლების ცენტრი კიდევ ერთ წარმატებას ულოცავს საარჩევნო ადმინისტრაციას, მადლობას უხდის სწავლების ცენტრის თითოეულ თანამშრომელს პროცესში შეტანილი წვლილისთვის.