2015 წლის 30 სექტემბერს, საქართველოს ცენტრალურმა საარჩევნო კომისიამ, საქართველოს განათლებისა და მეცნიერების სამინისტრომ და საარჩევნო სისტემების განვითარების, რეფორმებისა და სწავლების ცენტრმა ურთიერთთანამშრომლობის მემორანდუმი გააფორმა. აღიშნულ დოკუმენტს უწყებების ხელმძღვანელებმა მოაწერეს ხელი.
ცესკოს თავმჯდომარემ თამარ ჟვანიამ და მინისტრმა თამარ სანიკიძემ საჯარო სკოლების მოსწავლეთა სამოქალაქო ცნობიერების ამაღლებისა და საარჩევნო კულტურის განვითარების მნიშვნელობაზე ისაუბრეს. სწავლების ცენტრის დირექტორმა ნათია ზაალიშვილმა კი დამსწრე საზოგადოებას გააცნო შემუშავებული საინფორმაციო-სასწავლო პროექტი „არჩევნები და ახალგაზრდა ამომრჩეველი“, რომელიც ეტაპობრივად განხორციელდება საჯარო სკოლების XI-XII კლასის მოსწავლეებისათვის.
სწავლების ცენტრი სასწავლო კურსს პილოტის ფორმატში პირველ ეტაპზე განახორციელებს ეთნიკური უმცირესობებით დასახლებულ რეგიონებსა და მაღალმთიან რეგიონებში განლაგებულ საჯარო სკოლებში.
აღნიშნული ინიციატივა მიზნად ისახავს ახალგაზრდებში სამოქალაქო პასუხისმგებლობის ზრდისა და საზოგადოებრივ-პოლიტიკურ ცხოვრებაში აქტიურ მოქალაქეებად მათი ჩართულობის ხელშეწყობას.
ღონისძიება გაიმართა სასტუმრო „რედისონ ბლუ ივერიაში“ და მას ესწრებოდნენ სახელმწიფო დაწესებულებების, ადგილობრივი არასამთავრობო და საერთაშორისო ორგანიზაციების წარმომადგენლები.
