მიმდინარე წლის 19 ივნისს ცესკოს თავმჯდომარემ საარჩევნო სისტემების განვითარების რეფორმებისა და სწავლების ცენტრში არსებული იურიდიული კლინიკის მონაწილე სტუდენტებს სასწავლო კურსის დასრულება მიულოცა. თამარ ჟვანია მათ  არჩევნების გამჭირვალედ და პროფესიულ დონეზე ჩატარების მნიშვნელობაზე ესაუბრა, რაც ქვეყანაში დემოკრატიის განვითარების ერთ-ერთი უმნიშვნელოვანესი ნაწილია.

სტუდენტები, რომლებმაც სწავლების სამთვიანი კურსი გაიარეს, ცესკოს დეპარტამენტების ხელმძღვანელებსაც შეხვდენ და უშუალოდ მათგან მოისმინეს ინფორმაცია უწყების მუშაობისა და სტრუქტურის შესახებ.

ცესკოს სწავლების ცენტრში იურიდიული კლინიკა 2010 წლიდან ფუნქციონირებს და მისი მიზანი უმაღლესი საგანმანათლებლო დაწესებულებების იურიდიული ფაკულტეტის სტუდენტებში საარჩევნო სამართლის დარგში აუცილებელი პროფესიული ცოდნის გაღრმავება, მათი პრაქტიკული უნარ-ჩვევების განვითარება და სამოქალაქო ცნობიერების ამაღლებაა. ამ დროისთვის სასწავლო კურსი 144 სტუდენტს აქვს გავლილი. ბოლო სემესტრში სწავლება 2015 წლის 7 აპრილს დაიწყო და მასში მონაწილეობა ივანე ჯავახიშვილის სახელობის თბილისის სახელმწიფო უნივერსიტეტის, სოხუმის სახელმწიფო უნივერსიტეტის და კავკასიის უნივერსიტეტის იურიდიული ფაკულტეტის სტუდენტებმა მიიღეს.