ცენტრალურ საარჩევნო კომისიაში დღეს საარჩევნო სამოქალაქო განათლების პროგრამაში მონაწილე ახალგაზრდების დაჯილდოება გაიმართა. შესაბამისი სერტიფიკატები და სასაჩუქრე პაკეტები მათ ცესკოს თავმჯდომარემ თამარ ჟვანიამ, სწავლების ცენტრის ხელმძღვანელმა ნათია ზაალიშვილმა, სოციალური მომსახურების სააგენტოს მეურვეობა-მზრუნველობისა და სოციალური პროგრამების დეპარტამენტის უფროსმა მარი წერეთელმა და „ეს ო ეს ბავშვთა სოფლის“ ეროვნულმა დირექტორმა ზვიად ბერძენიშვილმა გადასცეს.

სწავლების ცენტრის მიერ შემუშავებული სასწავლო პროგრამის ფარგლებში თბილისის ეს-ო-ეს ბავშვთა სოფელში განთავსებული ახალგაზრდები საქართველოში არჩევნების ისტორიას, საარჩევნო სამართლის პრინციპებს, საკანონმდებლო ჩარჩოს, პოლიტიკაში ქალთა მონაწილეობის, საარჩევნო ადმინისტრაციის სტრუქტურისა და მუშაობის წესის, ამომრჩეველთა რესგისტრაციის/სიების და კენჭსყრის პროცედურებთან დაკავშირებულ საკითხებს გაეცნენ.

ახალგაზრდები დღეს, ასევე გაეცნენ ცესკოს სხვადასხვა დეპარტამენტების საქმიანობას და საარჩევნო ადმინისტრაციაში მიმდინარე აქტივობებს.

პროექტის ოცმა მონაწილემ სწავლება 2015 წლის 10 თებერვალს, საქართველოს ცენტრალურ საარჩევნო კომისიას, სსიპ საარჩევნო სისტემების განვითარების, რეფორმებისა და სწავლების ცენტრს, სსიპ სოციალური მომსახურების სააგენტოსა და ააიპ ასოციაცია საქართველოს ეს-ო-ეს ბავშვთა სოფელს შორის გაფორმებული მემორანდუმის ფარგლებში გაიარა.

ანალოგიური პროგრამის განხორციელება მიმდინარე წლის 4 მაისს დაიწყო ქუთაისის ეს-ო-ეს ბავშვთა სოფელში, რომელიც დასრულდება 15 მაისს.