საქართველოს ცენტრალური საარჩევნო კომისიისა და საქართველოს სასჯელაღსრულების, პრობაციისა და იურიდიული დახმარების საკითხთა სამინისტროს მიერ ინიცირებული ერთობლივი პროექტის ფარგლებში დაიგეგმა საგანმანათლებლო პროგრამის განხორციელება სასჯელაღსრულების სისტემის თანამშრომლებისა და ხმის მიცემის უფლების მქონე პატიმრებისათვის.

სასწავლო პროგრამას ახორციელებს ცესკოს სწავლების ცენტრი და სასჯელაღსრულებისა და პრობაციის სასწავლო ცენტრი.

პროექტი სამ ეტაპს მოიცავს:

I ეტაპი - სასჯელაღსრულების სისტემის თანამშრომელთა გადამზადება (ტრენერთა ტრენინგი)

II ეტაპი - ტრენერთა მიერ სასწავლო პროგრამის განხორციელება სასჯელაღსრულების დაწესებულების სხვა თანამშრომლებისათვის

III ეტაპი - ხმის მიცემის უფლების მქონე პატიმრების ინფორმირებულობის უზრუნველყოფა

პროექტის განხორციელება მიმდინარე წლის 16 ოქტომბერს დაიწყო. ტრენინგის ფარგლებში მონაწილეები გაეცნენ პატიმრობისა და თავისუფლების აღკვეთის დაწესებულებებში საარჩევნო პროცესების ორგანიზების საკითხებს, სააგიტაციო მასალების განთავსებისა და ხმის მიცემის უფლების მქონე პატიმრების ინფორმირების წესს, პატიმრების მიერ ხმის მიცემის პროცედურებს. ტრენინგის პრაქტიკული სწავლების ფორმატში, ასევე მოეწყო ცესკოს სწავლების ცენტრის მიერ მომზადებული სასწავლო ფილმის ”კენჭისყრის დღის პროცედურების” ჩვენება.

მონაწილეებს გადაეცათ ცესკოს სწავლების ცენტრისა და  სასჯელაღსრულებისა და პრობაციის სასწავლო ცენტრის მიერ  მომზადებული  დამხმარე სახელმძღვანელოები.

პატიმრების მიერ საარჩევნო უფლების სრულფასოვნად რეალიზებასთან დაკავშირებით მათი ინფორმირებულობის ამაღლების მიზნით მომზადდა შესაბამისი საინფორმაციო ხასიათის ბუკლეტები, რომლებიც გადაეცათ სასჯელაღსრულების დაწესებულებების ადმინისტრაციებს მათი გავრცელების უზრუნველსაყოფად.