2026 წლის 3 ოქტომბერს მუნიციპალიტეტებში გასამართი საკრებულოების შუალედური არჩევნებისთვის, ცესკოს და სწავლების ცენტრის ეგიდით, საუბნო საარჩევნო კომისიების წევრებმა ინტენსიური გადამზადება გაიარეს. ტრენინგები წალკის, ახმეტის, დმანისის და ვანის მუნიციპალიტეტებში 2 სექტემბრიდან 21 სექტემბრის ჩათვლით პერიოდში განხორციელდა.

სწავლების ცენტრის მიერ შემუშავებული კონცეფციის შესაბამისად, ტრენინგები განსხვავებული ფორმატით განხორციელდა იმ საუბნო საარჩევნო კომისიებისთვის, რომლებიც კენჭისყრას საარჩევნო ელექტრონული აპარატების გამოყენებით და მათი გამოყენების გარეშე წარმართავენ. ელექტრონული აპარატებით კენჭისყრის პროცესის წარმმართველი კომისიებისთვის სწავლება ხუთ ეტაპად, ხოლო სხვა კომისიებისთვის - ოთხ ეტაპად ჩატარდა.

ტრენინგების ფარგლებში საუბნო საარჩევნო კომისიების წევრებმა, კენჭისყრის პროცედურების სპეციფიკის გათვალისწინებით, დეტალურად გაიარეს ამომრჩევლებისთვის განკუთვნილი სერვისები და მათი განხორციელების პრაქტიკული საკითხები. საარჩევნო კომისიებისთვის, სადაც კენჭისყრა ელექტრონული აპარატების გამოყენებით წარიმართება, განსაკუთრებული ყურადღება აპარატებთან მუშაობის პრაქტიკულ სწავლებას დაეთმო.

საარჩევნო ადმინისტრატორების პროფესიული გადამზადების მნიშვნელობიდან გამომდინარე, სწავლების ცენტრის კონცეფცია ტრენინგების დამატებით ეტაპსაც ითვალისწინებს. სამიზნე აუდიტორიას საუბნო საარჩევნო კომისიების ხელმძღვანელი პირები და წევრები წარმოადგენენ, რომლებმაც ვერ გაიარეს ტრენინგების შესაბამისი ეტაპი ან ტრენინგების მიმდინარეობისას შეიცვალნენ.

დამატებითი ეტაპის ტრენინგები 26-27 სექტემბერს ჩატარდება. გრაფიკები ხელმისაწვდომია ქვემოთ მოცემულ ბმულებზე. გრაფიკებში ცვლილების შემთხვევაში, ინფორმაცია განახლდება.

გრაფიკი - საუბნო საარჩევნო კომისიებისთვის, რომლებიც კენჭისყრის პროცესს წარმართავენ საარჩევნო ელექტრონული აპარატების გამოყენებით.

გრაფიკი - საუბნო საარჩევნო კომისიებისთვის, რომლებიც კენჭისყრის პროცესს წარმართავენ საარჩევნო ელექტრონული აპარატების გამოყენების გარეშე.