საარჩევნო სისტემების განვითარების, რეფორმებისა და სწავლების ცენტრმა (სწავლების ცენტრი) საარჩევნო სამართლის დარგში შემუშავებული საავტორო სასწავლო პროგრამა 2026 წლის გაზაფხულის სემესტრში 9 პარტნიორ უნივერსიტეტში წარმატებით განახორციელა.

კურსი იურიდიული, პოლიტიკურ და სოციალურ მეცნიერებათა მიმართულებების საბაკალავრო პროგრამების III-IV კურსის 477-მა სტუდენტმა გაიარა, მათ შორის, 28 სტუდენტი ეთნიკური უმცირესობებით კომპაქტურად დასახლებული რეგიონიდან, ახალციხიდან იყო.

პროგრამა ხორციელდება ცესკოს და სწავლების ცენტრის საარჩევნო სამოქალაქო განათლების პროექტის ფარგლებში და მიზნად ისახავს ახალგაზრდებში საარჩევნო ცნობიერების ამაღლებას, დემოკრატიული პროცესებისადმი პასუხისმგებლიანი დამოკიდებულების ჩამოყალიბებას, იმ ცოდნისა და პრაქტიკული უნარების განვითარებას, რომლებიც აუცილებელია ინფორმირებული, კრიტიკულად მოაზროვნე და აქტიური მოქალაქისთვის.

სწავლების ცენტრის მიერ შემუშავებული სილაბუსის ფარგლებში სტუდენტები გაეცნენ არჩევნებთან დაკავშირებულ ეროვნულ სამართლებრივ რეგულაციებს, არჩევნების ჩატარების საერთაშორისო სტანდარტებსა და პრაქტიკას, საარჩევნო პროცესის საინფორმაციო უზრუნველყოფისა და მედიაგაშუქების მექანიზმებს, არჩევნების მოდერნიზაციის პროცესს ელექტრონული ტექნოლოგიების გამოყენებით, საქართველოში არჩევნების ადმინისტრირების სისტემასა და ამომრჩევლებისთვის ხელმისაწვდომ საარჩევნო სერვისებს.

პროგრამა განხორციელდა შემდეგ პარტნიორ უნივერსიტეტებში: ივანე ჯავახიშვილის სახელობის თბილისის სახელმწიფო უნივერსიტეტი, ილიას სახელმწიფო უნივერსიტეტი, კავკასიის საერთაშორისო უნივერსიტეტი, საქართველოს საერთაშორისო უნივერსიტეტი (ჯიუ), აღმოსავლეთ ევროპის უნივერსიტეტი, გორის სახელმწიფო უნივერსიტეტი, სამცხე-ჯავახეთის სახელმწიფო უნივერსიტეტი, იაკობ გოგებაშვილის სახელობის თელავის სახელმწიფო უნივერსიტეტი, გრიგოლ რობაქიძის უნივერსიტეტის ბათუმის ფილიალი.

მონაწილეებმა სასწავლო კურსი დადებითად შეაფასეს. მათი მოსაზრებით, პროგრამა მნიშვნელოვნად უწყობს ხელს როგორც საარჩევნო სამართლის სფეროში სპეციალიზებული ცოდნის გაღრმავებას, ისე დემოკრატიული ღირებულებების, საარჩევნო კულტურის, კრიტიკული აზროვნებისა და სამოქალაქო პასუხისმგებლობის გაძლიერებას.

ცესკო და სწავლების ცენტრი აღნიშნულ პროექტს თბილისისა და რეგიონების პარტნიორ უნივერსიტეტებში 2010 წლიდან ახორციელებს. ამ დროის განმავლობაში პროგრამა 10 000-ზე მეტმა სტუდენტმა გაიარა, რაც ახალგაზრდებში საარჩევნო განათლების მიმართულებით პროექტის მდგრადობასა და ეფექტიანობას ადასტურებს.