პენიტენციურ დაწესებულებებში მყოფი ამომრჩევლების 2025 წლის 4 ოქტომბრის მუნიციპალიტეტის ორგანოთა არჩევნებში მონაწილეობის ხელშეწყობის და მათი საყოველთაო საარჩევნო უფლების რეალიზების მიზნით,  სწავლების ცენტრი უზრუნველყოფს გამონაკლის შემთხვევაში შექმნილი ათი საუბნო საარჩევნო კომისიის წევრების გადამზადებას.

სასწავლო პროგრამის ფარგლებში საუბნო საარჩევნო კომისიების ხელმძღვანელი პირები და წევრები განიმტკიცებენ კენჭისყრის პროცესის მართვის პრაქტიკულ უნარებს, მიიღებენ სპეციალიზებულ ცოდნას განსახორციელებელი საქმიანობებისა და იმ სტანდარტების შესახებ, რომლის ერთგვაროვნად შესრულება არსებითია ამომრჩევლებისთვის კვალიფიციური სერვისის მიწოდების პროცესში.

სწავლების ცენტრის მიერ გადამზადებული ტრენერები საუბნო საარჩევნო კომისიებს (სრული შემადგენლობით) გააცნობენ შემდეგ ძირითად საკითხებს: 

• საუბნო საარჩევნო კომისიის მზადება კენჭისყრის დღისთვის (საოლქო საარჩევნო კომისიისგან მისაღები საარჩევნო დოკუმენტაცია/ინვენტარი, კენჭისყრის შენობის მოწყობა, ფოტო-ვიდეოგადაღების ადგილის გამოყოფა);
• საუბნო საარჩევნო კომისიის საქმიანობის პროცესში გასათვალისწინებელი პროფესიული სტანდარტები (კანონიერების, პოლიტიკური ნეიტრალიტეტის, პროფესიონალიზმის პრინციპები, ეთიკა);
• ამომრჩევლისთვის სერვისის უზრუნველსაყოფად საუბნო საარჩევნო კომისიის წევრების მიერ კენჭისყრის დღეს შესასრულებელი ფუნქციების განაწილების წესი და მათი შესრულების ტექნიკა (ნაკადის მომწესრიგებლის, რეგისტრატორების, სპეციალური კონვერტებისა და საარჩევნო ყუთის ზედამხედველი კომისიის წევრის, გადასატანი საარჩევნო ყუთის წამღები კომისიის წევრების ფუნქციები); 
• საარჩევნო უბანზე კენჭისყრის პროცესის მიმდინარეობისას ამომრჩეველთა აქტივობის დადგენა;
• საარჩევნო უბანზე საარჩევნო ბიულეტენების დახარისხების პროცედურა (საარჩევნო ბიულეტენების ნამდვილობის/ბათილობის საფუძვლები; საეჭვოდ მიჩნეულ საარჩევნო ბიულეტენზე საუბნო საარჩევნო კომისიის მიერ გადაწყვეტილების მიღების წესი);
• ხმის დათვლის პროცესში დამკვირვებლებისგან გამოვლენილი მეთვალყურეების, საარჩევნო სუბიექტების წარმომადგენლების ჩართულობის უზრუნველყოფა და მათ მიერ განსახორციელებელი დაკვირვების ფარგლები;
• საარჩევნო უბანზე კენჭისყრის შედეგების შეჯამება (ოქმების შევსების პროცედურა, მათი საჯაროობის უზრუნველყოფა და კენჭისყრის შენობაში ყოფნის უფლების მქონე პირების მოთხოვნის საფუძველზე ოქმების დამოწმებული ასლების გაცემის წესი);
• კენჭისყრის დღის განცხადება/საჩივრებზე რეაგირება;
• კენჭისყრის პროცესის დასრულების შემდგომ საუბნო საარჩევნო კომისიის მიერ განსახორციელებელი ლოგისტიკური პროცესი (საოლქო საარჩევნო კომისიისთვის გადასაცემი საარჩევნო დოკუმენტაცია, ინვენტარი).

ტრენინგი პრაქტიკულ სწავლებაზე დაფუძნებით წარიმართება, გათვალისწინებულია სხვადასხვა თემატური სავარჯიშოს შესრულება.

გამონაკლის შემთხვევაში შექმნილი საუბნო საარჩევნო კომისიების ტრენინგები 2025 წლის 26 სექტემბერს ჩატარდება. გრაფიკი ხელმისაწვდომია ბმულზე. მასში ცვლილებების განხორციელების შემთხვევაში, ინფორმაცია აისახება დაუყოვნებლივ.