2025 წლის 21 სექტემბრიდან ტრენინგების III ეტაპი იწყება იმ საუბნო საარჩევნო კომისიებისთვის, რომლებიც კენჭისყრის პროცესს წარმართავენ საარჩევნო ელექტრონული აპარატების გამოყენების გარეშე. გადამზადების აღნიშნულ ეტაპზე სამიზნე აუდიტორიას საუბნო საარჩევნო კომისიების ხელმძღვანელი პირები (კომისიის თავმჯდომარე, თავმჯდომარის მოადგილე, კომისიის მდივანი) წარმოადგენენ.

სწავლების ცენტრის მიერ გადამზადებული ტრენერები მონაწილეებს მიაწვდიან დეტალურ ინფორმაციას საუბნო საარჩევნო კომისიის ხელმძღვანელი პირების საორგანიზაციო-საზედამხედველო უფლებამოსილებების განხორციელებასთან დაკავშირებით. განიხილება შემდეგი ძირითადი ასპექტები:

• კენჭისყრის დღეს საარჩევნო უბანზე კენჭისყრის პროცესის დაწყებამდე ჩასატარებელი პროცედურები (მათ შორის, კენჭისყრის შენობაში ყოფნის უფლების მქონე პირების რეგისტრაცია);
• გადასატანი საარჩევნო ყუთით კენჭისყრის პროცესის უზრუნველსაყოფად ჩასატარებელი პროცედურები (მათ შორის, შენობაში ყოფნის უფლების მქონე პირთაგან წილისყრით მეთვალყურეების გამოვლენა);
• საარჩევნო უბანზე კენჭისყრის პროცესის მიმდინარეობისას ამომრჩეველთა აქტივობის დადგენა;
• საარჩევნო უბნის დახურვიდან კენჭისყრის შედეგების შემაჯამებელი ოქმის შედგენამდე ჩასატარებელი პროცედურები (მათ შორის, ძირითადი და გადასატანი საარჩევნო ყუთების გახსნა, მთვლელების მიერ საარჩევნო ბიულეტენების დახარისხება-დათვლის პროცედურის წარმართვა; დამკვირვებლებისგან გამოვლენილი მეთვალყურეების, საარჩევნო სუბიექტების წარმომადგენლების ჩართულობის უზრუნველყოფა და მათ მიერ განსახორციელებელი დაკვირვების ფარგლები);
• საარჩევნო უბანზე კენჭისყრის შედეგების შეჯამება (ოქმების შევსების პროცედურა, მათი საჯაროობის უზრუნველყოფა და კენჭისყრის შენობაში ყოფნის უფლების მქონე პირების მოთხოვნის საფუძველზე ოქმების დამოწმებული ასლების გაცემის წესი);
• კენჭისყრის პროცესის დასრულების შემდგომ საუბნო საარჩევნო კომისიის მიერ განსახორციელებელი ლოგისტიკური პროცესი (საოლქო საარჩევნო კომისიისთვის გადასაცემი საარჩევნო დოკუმენტაცია, ინვენტარი).

ტრენინგები პრაქტიკულ სწავლებაზე დაფუძნებით წარიმართება, გათვალისწინებულია სხვადასხვა სახის თემატური სავარჯიშოს შესრულება. ამასთან, მონაწილეები გაეცნობიან ცესკოს და სწავლების ცენტრის მიერ საუბნო საარჩევნო კომისიებისთვის მომზადებულ სამახსოვრო ინსტრუქციებს. აღნიშნულ დამხმარე რესურსებში ფუნქციების შესაბამისად სისტემატიზირებულია კომისიის ხელმძღვანელი პირებისა და წევრების მიერ შესასრულებელი საქმიანობები, რაც მიზნად ისახავს ტრენინგებზე მიღებული ინფორმაციის პრაქტიკაში ერთგვაროვნად გამოყენების და კენჭისყრის პროცესის ორგანიზებულად წარმართვის ხელშეწყობას.

III ეტაპის ტრენინგები ჩატარდება 2025 წლის 21-22 სექტემბრის პერიოდში. გრაფიკები ხელმისაწვდომია ბმულზე. ცვლილებების შეტანის შემთხვევაში, ინფორმაცია აისახება დაუყოვნებლივ.