მუნიციპალიტეტის ორგანოთა 2025 წლის 4 ოქტომბრის არჩევნების უსაფრთხო და თავისუფალ გარემოში ჩატარების ხელშეწყობის მიზნით, ცენტრალურმა საარჩევნო კომისიამ და სსიპ საარჩევნო სისტემების განვითარების, რეფორმებისა და სწავლების ცენტრმა, შინაგან საქმეთა სამინისტროს აკადემიასთან თანამშრომლობით, პოლიციელებისთვის სპეციალიზებული საინფორმაციო-სასწავლო პროგრამა ჩაატარა.
მასშტაბური პროექტი 2025 წლის 8-15 სექტემბრის პერიოდში ყოველდღიურ რეჟიმში, რამდენიმე ნაკადად განხორციელდა და მასში მონაწილეობა პოლიციის 1619-მა თანამშრომელმა მიიღო.
პროგრამის „არჩევნები და უსაფრთხოება“ ფარგლებში, სწავლების ცენტრის და ცესკოს იურიდიული დეპარტამენტის თანამშრომლებმა სამართალდამცავი ორგანოების წარმომადგენლებთან მნიშვნელოვანი საკითხები განიხილეს, მათ შორის: საარჩევნო ადმინისტრაციას და სამართალდამცავ ორგანოებს შორის ეფექტიანი კომუნიკაცია უსაფრთხო საარჩევნო გარემოს უზრუნველსაყოფად; კენჭისყრის დღემდე პერიოდში და კენჭისყრის დღეს საარჩევნო პროცესის უსაფრთხოების მიზნით რისკების იდენტიფიცირება, პრევენცია და რეაგირების მექანიზმები.
პროექტი ცენტრალურ საარჩევნო კომისიას და შინაგან საქმეთა სამინისტროს შორის 2025 წლის 2 სექტემბერს გაფორმებული ურთიერთთანამშრომლობის მემორანდუმის ფარგლებში განხორციელდა.
