2025 წლის 4 ოქტომბრის არჩევნების უსაფრთხო გარემოში ჩატარების უზრუნველყოფის მიზნით, ცენტრალური საარჩევნო კომისიის თავმჯდომარემ გიორგი კალანდარიშვილმა და შინაგან საქმეთა მინისტრმა გეკა გელაძემ, 2 სექტემბერს, ურთიერთთანამშრომლობის მემორანდუმი გააფორმეს, რომლის ფარგლებში  ერთ-ერთ მნიშვნელოვან მიმართულებად პოლიციელების გადამზადება განისაზღვრა.

ინიციირებული საკითხის გათვალისწინებით, სსიპ საარჩევნო სისტემების განვითარების, რეფორმებისა და სწავლების ცენტრის შინაგან საქმეთა სამინისტროს აკადემიასთან ნაყოფიერი თანამშრომლობის ფორმატში დაიგეგმა მასშტაბური საინფორმაციო-სასწავლო პროექტი სამართალდამცავი ორგანოების წარმომადგენლებისთვის.

პროგრამა 8 სექტემბრიდან დაიწყო და 12 სექტემბრის ჩათვლით პერიოდში, ყოველდღიურ რეჟიმში, რამდენიმე ნაკადად ჩატარდება. კურსის განხორციელებას სწავლების ცენტრის და ცესკოს იურიდიულ დეპარტამენტის თანამშრომლები უზრუნველყოფენ.

პოლიციელების მაქსიმალური რაოდენობით ჩართულობის ხელშეწყობის მიზნით, სატრენინგო სესიები დისტანციური სწავლების მეთოდით წარიმართება. სპეციალიზებული პროგრამის „არჩევნები და უსაფრთხოება“ ფარგლებში შემდეგი მნიშვნელოვანი საკითხები განიხილება: უსაფრთხო და მშვიდობიანი საარჩევნო გარემოს უზრუნველსაყოფად ეფექტიანი კომუნიკაცია საარჩევნო ადმინისტრაციასა და სამართალდამცავ ორგანოებს შორის; კენჭისყრის დღემდე პერიოდში და კენჭისყრის დღეს საარჩევნო პროცესის უსაფრთხოების უზრუნველსაყოფად რისკების იდენტიფიცირება,  პრევენცია და რეაგირების მექანიზმები.

სწავლების ცენტრსა და შსს აკადემიას შორის პარტნიორობა მრავალწლიან თანამშრომლობას ეფუძნება და არჩევნების თავისუფალ, მშვიდ  გარემოში  ჩატარების ხელშეწყობის მიზანს ემსახურება.