მუნიციპალიტეტის ორგანოთა არჩევნებისთვის ცესკოს და სწავლების ცენტრის მიერ შემუშავებული კონცეფციის მიხედვით, 2025 წლის 25 აგვისტოდან ტრენინგების III ეტაპი იწყება იმ საუბნო საარჩევნო კომისიებისთვის, რომლებიც კენჭისყრის პროცესს წარმართავენ საარჩევნო ელექტრონული აპარატების გამოყენებით.

განგრძობითი ტრენინგების ფარგლებში, აღნიშნული ეტაპი საუბნო საარჩევნო კომისიების ხელმძღვანელი პირების (კომისიის თავმჯდომარე, თავმჯდომარის მოადგილე, მდივანი) გადამზადებას ეთმობა.

სწავლების ცენტრის ტრენერები სამიზნე აუდიტორიას მიაწვდიან დეტალურ ინფორმაციას საუბნო საარჩევნო კომისიის ხელმძღვანელი პირების საორგანიზაციო/საზედამხედველო უფლებამოსილებების განხორციელებასთან დაკავშირებით. განიხილება შემდეგი ძირითადი ასპექტები:

• კენჭისყრის დღეს საარჩევნო უბანზე კენჭისყრის პროცესის დაწყებამდე ჩასატარებელი პროცედურები (მათ შორის, კენჭისყრის შენობაში ყოფნის უფლების მქონე პირების რეგისტრაცია; საუბნო საარჩევნო კომისიის წევრების მიერ შესასრულებელი ფუნქციების ასახვა ჩანაწერთა წიგნში; რაოდენობრივი მონაცემების გამოცხადება, სადემონსტრაციო ოქმის წარმოება);
• გადასატანი საარჩევნო ყუთით კენჭისყრის პროცესის უზრუნველსაყოფად ჩასატარებელი პროცედურები (მათ შორის, შენობაში ყოფნის უფლების მქონე პირთაგან წილისყრით მეთვალყურეების გამოვლენა);
• საარჩევნო უბანზე კენჭისყრის პროცესის მიმდინარეობისას ამომრჩეველთა აქტივობის დადგენა (მონაცემების გადაცემა ცესკოსთვის და ასახვა შესაბამის სადემონსტრაციო ოქმებში);
• საარჩევნო უბნის დახურვიდან კენჭისყრის შედეგების შემაჯამებელი ოქმის შედგენამდე ჩასატარებელი პროცედურები (მათ შორის, გადასატანი საარჩევნო ყუთის გახსნა და ხმის დათვლის ელექტრონული აპარატის მეშვეობით ძირითად საარჩევნო ყუთში საარჩევნო ბიულეტენების მოთავსება; ხმის დათვლის აპარატიდან წინასწარი შედეგების შესახებ კონსოლიდირებული ამონაწერის ბეჭდვა, საჯაროობა და პლანშეტით ცესკოსთვის გადაცემა; საარჩევნო ბიულეტენების დახარისხება-დათვლის პროცედურის წარმართვა; დამკვირვებლებისგან გამოვლენილი მეთვალყურეების, საარჩევნო სუბიექტების წარმომადგენლების ჩართულობის უზრუნველყოფა და მათ მიერ განსახორციელებელი დაკვირვების ფარგლები);
• საარჩევნო უბანზე კენჭისყრის შედეგების შეჯამება (კენჭისყრის შემაჯამებელი ოქმების შევსების პროცედურა, ოქმების საჯაროობის უზრუნველყოფა და კენჭისყრის შენობაში ყოფნის უფლების მქონე პირების მოთხოვნის საფუძველზე ოქმების დამოწმებული ასლების გაცემის წესი);
• კენჭისყრის პროცესის დასრულების შემდგომ საუბნო საარჩევნო კომისიის მიერ განსახორციელებელი ლოგისტიკური პროცესი (საოლქო საარჩევნო კომისიისთვის გადასაცემი საარჩევნო ელექტრონული აპარატები, საარჩევნო დოკუმენტაცია, ინვენტარი).

ამასთან, ტრენინგის მონაწილეები გაეცნობიან ცესკოს და სწავლების ცენტრის მიერ საუბნო საარჩევნო კომისიებისთვის მომზადებულ სამახსოვრო ინსტრუქციებს. აღნიშნულ დამხმარე რესურსებში ფუნქციების შესაბამისად სისტემატიზირებულია კომისიის ხელმძღვანელი პირებისა და წევრების მიერ შესასრულებელი საქმიანობები, რაც მიზნად ისახავს ტრენინგებზე მიღებული ინფორმაციის პრაქტიკაში ერთგვაროვნად გამოყენების და კენჭისყრის პროცესის ორგანიზებულად წარმართვის ხელშეწყობას.

სწავლების ცენტრის მიერ გადამზადებული ტრენერები III ეტაპის ტრენინგების ჩატარებას უზრუნველყოფენ 2025 წლის 25-26 აგვისტოს პერიოდში. გრაფიკები ხელმისაწვდომია ბმულზე. ცვლილებების შეტანის შემთხვევაში, ინფორმაცია აისახება დაუყოვნებლივ.