ცესკო და სწავლების ცენტრი მუნიციპალიტეტის ორგანოთა 2025 წლის 4 ოქტომბრის არჩევნებისთვის საუბნო საარჩევნო კომისიების ტრენინგების ციკლს აგრძელებს.

2025 წლის 22 აგვისტოდან ტრენინგების II ეტაპი იწყება იმ საუბნო საარჩევნო კომისიებისთვის, რომლებიც კენჭისყრის პროცესს წარმართავენ საარჩევნო ელექტრონული აპარატების გამოყენებით. გადამზადების აღნიშნულ ეტაპზე სამიზნე აუდიტორიას საუბნო საარჩევნო კომისიების ხელმძღვანელი პირები (კომისიის თავმჯდომარე, თავმჯდომარის მოადგილე) წარმოადგენენ.

სპეციალიზებული პროგრამის ფარგლებში, მონაწილეები მიიღებენ საფუძვლიან ინფორმაციას შემდეგ ძირითად საკითხებზე:

• კენჭისყრის პროცესში ინტეგრირებული საარჩევნო ელექტრონული საშუალებების გამოყენებით საარჩევნო უბანზე ამომრჩევლისთვის მისაწოდებელი სერვისები;
• კენჭისყრის ადმინისტრირების პროცესში ამომრჩეველთა ვერიფიკაციის აპარატების, ხმის დათვლის ელექტრონული აპარატების და წინასწარი შედეგების გადაცემისთვის განკუთვნილი პლანშეტის მართვა (აპარატების/პლანშეტის ფუნქციები, მათი შესრულების მიზნობრიობა და კენჭისყრის დღის ის პერიოდები, როდესაც ხდება აპარატებში/პლანშეტში შესაბამისი ფუნქციების გააქტიურება);
• მზადება კენჭისყრის დღისთვის - კენჭისყრის პროცესის ლოგისტიკური უზრუნველყოფა; კენჭისყრის შენობის მოწყობა; კენჭისყრის პროცესის ადმინისტრირებისთვის საუბნო საარჩევნო კომისიის თავმჯდომარის მიერ კომისიის წევრებს შორის ფუნქციების განაწილების პროცედურა.

საუბნო საარჩევნო კომისიების ხელმძღვანელ პირთა პროცედურული ცოდნის და საარჩევნო ელექტრონული აპარატების მართვის უნარების განმტკიცების ხელშეწყობის მიზნით, ტრენინგები ჩატარდება კომბინირებული მეთოდოლოგიის გამოყენებით, მონაწილეები განახორციელებენ ეპიზოდურ ინსცენირებებს.

სწავლების ცენტრის მიერ გადამზადებული ტრენერები II ეტაპის ტრენინგების ჩატარებას უზრუნველყოფენ 2025 წლის 22-24 აგვისტოს ჩათვლით პერიოდში. გრაფიკები ხელმისაწვდომია ბმულზე. ცვლილებების შეტანის შემთხვევაში, ინფორმაცია აისახება დაუყოვნებლივ.