ცესკო და სწავლების ცენტრი აქტიურად განაგრძობს საქმიანობას საარჩევნო სამოქალაქო განათლების მიმართულებით, რაც 2025 წლის სამოქმედო გეგმის შესაბამისად პრიორიტეტულ ამოცანად არის განსაზღვრული. ამ მიზნით შემუშავებული კონცეფციის მიხედვით განსაკუთრებული ყურადღება ახალგაზრდებს დაეთმობა.

სწავლების ცენტრი 2025 წლის საინფორმაციო-სასწავლო ციკლს პარტნიორ უნივერსიტეტებში საარჩევნო სამართლის დარგში საავტორო პროგრამის განხორციელებით იწყებს. აღნიშნული პროგრამა უმაღლესი საგანმანათლებლო დაწესებულებების სასწავლო ბადეში გაზაფხული/შემოდგომის სემესტრში იკითხება. სასწავლო პროექტის ბენეფიციარები იურიდიული, სოციალურ მეცნიერებათა და ჟურნალისტიკის ფაკულტეტის საბაკალავრო პროგრამის III-IV კურსის სტუდენტები არიან, რომლებიც პროფილური მიმართულებების გათვალისწინებით შემუშავებული სილაბუსის მიხედვით ეცნობიან არჩევნებთან დაკავშირებულ შიდასახელმწიფოებრივ რეგულაციებს და საერთაშორისო საარჩევნო პრაქტიკას.

სწავლების ცენტრის მიერ 2025 წლისთვის განახლებული საუნივერსიტეტო პროგრამის მნიშვნელოვანი კომპონენტი უკავშირდება სტუდენტების ინფორმირების უზრუნველყოფას მიმდინარე წელს ოქტომბერში გასამართი ადგილობრივი თვითმმართველობის ორგანოთა არჩევნებისა და შესაბამისი საკანონმდებლო სიახლეების შესახებ. სწორედ აღნიშნული საკითხების განხილვას დაეთმო შეხვედრა, რომელიც სწავლების ცენტრმა 5 თებერვალს ლექტორებთან გამართა.

დეტალური ინსტრუქტაჟის ფორმატში სწავლების ცენტრის წარმომადგენლებმა ლექტორებს გააცნეს განახლებული სასწავლო მოდულები, პრაქტიკული სავარჯიშოები და სალექციო კურსის ჩასატარებლად შემუშავებული რესურსები. ყურადღება გამახვილდა არჩევნების მოდერნიზებასა და ელექტრონულ ტექნოლოგიურ სიახლეებზე, 2025 წლის გაზაფხულის სემესტრული სწავლება პარტნიორ უნივერსიტეტებში 17 თებერვლიდან დაიწყება.

შეხვედრის მონაწილეებმა პროექტის განვლილი ეტაპიც შეაჯამეს. 2024 წელს, გაზაფხულის და შემოდგომის სემესტრში, სასწავლო პროგრამა ივანე ჯავახიშვილის სახელობის თბილისის სახელმწიფო უნივერსიტეტში, აღმოსავლეთ ევროპის უნივერსიტეტში, ილიას სახელმწიფო უნივერსიტეტში, კავკასიის საერთაშორისო უნივერსიტეტში, გორის სახელმწიფო უნივერსიტეტში, სსიპ იაკობ გოგებაშვილის სახელობის თელავის სახელმწიფო უნივერსიტეტში, სამცხე-ჯავახეთის სახელმწიფო უნივერსიტეტში, სსიპ ბათუმის შოთა რუსთაველის სახელმწიფო უნივერსიტეტში, გრიგოლ რობაქიძის სახელობის უნივერსიტეტსა და ამავე უნივერსიტეტის ბათუმის ფილიალში ჩატარდა. მასში მონაწილეობა 945 სტუდენტმა მიიღო (მათ შორის ქალი - 564, კაცი - 381). 

სწავლების ცენტრი საარჩევნო სამართლის დარგში საავტორო პროგრამას თბილისსა და რეგიონებში მოქმედ პარტნიორ უნივერსიტეტებში 2010 წლიდან ახორციელებს. დღემდე, სასწავლო პროგრამა 9000-მდე სტუდენტმა გაიარა.