პროფილური გადამზადების განგრძობითი პროცესის ფარგლებში, სწავლების ცენტრმა ცესკოს კონტაქტ-ჰაბის ოპერატორებისთვის, 2024 წლის 16 ოქტომბერს, მორიგი საინფორმაციო-სასწავლო კურსი განახორციელა.
პროგრამის მიზანი საარჩევნო საკითხებზე მოქალაქეებთან ეფექტიანი და მყისიერი კომუნიკაციის პლატფორმის მხარდაჭერას უკავშირდება. ამ მიმართებით მნიშვნელოვან როლს ცესკოს კონტაქტ-ჰაბი ასრულებს, რომელიც 26 ოქტომბრის არჩევნებისთვის მუდმივ რეჟიმში ამომრჩევლების ინფორმირებას უზრუნველყოფს.
სწავლების ცენტრის მიერ ჩატარებულ შეხვედრაზე მონაწილეებმა დამატებით გაიარეს ინსტრუქტაჟი კენჭისყრის დღეს საუბნო საარჩევნო კომისიების მიერ განსახორციელებელ საქმიანობაზე და მიიღეს ინფორმაცია იმ სტანდარტების შესახებ, რომლის ერთგვაროვნად შესრულება არსებითია ამომრჩევლებისთვის კვალიფიციური სერვისის მიწოდების პროცესში. ყურადღება გამახვილდა ისეთ საკითხებზე, როგორიცაა: ამომრჩევლებისთვის თანაბარი და ხელმისაწვდომი საარჩევნო სერვისები; ამომრჩევლის ნების თავისუფალი გამოვლენის გარანტირებულობა; არჩევანის ფარულობის და საარჩევნო უბანზე ამომრჩევლის პერსონალური მონაცემების დაცვა; ინკლუზიური საარჩევნო გარემოს შექმნა და მხარდაჭერა; პროცესზე შეუფერხებელი დაკვირვების პირობების უზრუნველყოფა; კენჭისყრის წინასწარი შედეგების და შემაჯამებელი ოქმის საჯაროობა.
სწავლების ცენტრის მიერ ცესკოს კონტაქტ-ჰაბის ოპერატორებისთვის განხორციელებული ტრენინგები არჩევნებისთვის მოსამზადებელი მასშტაბური საინფორმაციო-სასწავლო პროექტის მნიშვნელოვანი ნაწილია.
