ცესკო და სწავლების ცენტრი აგრძელებს საინფორმაციო კამპანიას, რომლის მიზანია საარჩევნო პროცესში დანერგილი ტექნოლოგიური სიახლეების გაცნობა ახალგაზრდებისთვის და მათი აქტიურ, ინფორმირებულ ამომრჩევლებად ჩამოყალიბების ხელშეწყობა.
ამ ეტაპზე საინფორმაციო შეხვედრა საქართველოს SOS ბავშვთა სოფლის ეროვნული ასოციაციის ინიციატივით, თბილისში, 2024 წლის 22 ივნისს ჩატარდა. მასში მონაწილეობა ასოციაციის ბენეფიციარმა 22-მა სტუდენტმა მიიღო.
შეხვედრა ცესკოს თავმჯდომარის მოადგილემ გიორგი შარაბიძემ გახსნა, რომელმაც საარჩევნო პროცესებში ელექტრონული ტექნოლოგიების გამოყენების დადებით ასპექტებსა და არჩევნების მოდერნიზაციის ტენდენციებზე ისაუბრა. მონაწილეებს ასევე სწავლების ცენტრის დირექტორის მოადგილე ნინო ბერულავა მიესალმა, რომელმაც ყურადღება გაამახვილა სამოქალაქო ცნობიერების ამაღლებისა და არჩევნებში თითოეული ამომრჩევლის როლის მნიშვნელობის საკითხებზე.
სწავლების ცენტრის წარმომადგენლებმა საინფორმაციო კურსის ფარგლებში ახალგაზრდებს გააცნეს ელექტრონული აპარატებით კენჭისყრის ჩატარების სიახლეები და საქართველოს საარჩევნო ადმინისტრაციის მიერ ამომრჩევლებისთვის შეთავაზებული სერვისები. შეხვედრა პრაქტიკული სწავლების ფორმატით წარიმართა, სტუდენტებმა ელექტრონული აპარატების გამოყენებით იმიტირებული კენჭისყრაში მიიღეს მონაწილეობა.
ახალგაზრდებთან განგრძობითი ხასიათის კამპანია ეხმიანება ცესკოს და სწავლების ცენტრის საქმიანობის სტრატეგიულ პრიორიტეტს, რაც საარჩევნო გარემოს გაუმჯობესებასა და საზოგადოების ინფორმირებულობის ზრდის ხელშეწყობაზეა ორიენტირებული.
