ცესკო და სწავლების ცენტრი საარჩევნო პროცესებში ახალგაზრდების ჩართულობის ხელშეწყობის მიზნით საინფორმაციო-სასწავლო კამპანიას აგრძელებს.  ამჯერად შეხვედრა ქალაქ თბილისის №203-ე საჯარო სკოლაში ჩატარდა, დაწესებულება სმენის არმქონე და სმენადაზიანებულ ბავშვთა სწავლებაზეა სპეციალიზებული.

ცესკოს თავმჯდომარის მოადგილემ გიორგი შარაბიძემ და სწავლების ცენტრის დირექტორმა ნათია ზაალიშვილმა შეხვედრის გახსნის ნაწილში საარჩევნო პროცესში ახალგაზრდების ჩართულობის როლის მნიშვნელობაზე ისაუბრეს და სკოლის დამამთავრებელი კლასის მოსწავლეებთან (XI-XII კლასი) საარჩევნო ადმინისტრაციის საქმიანობის პრაქტიკული ასპექტები განიხილეს, რაც უკავშირდება ამომრჩევლებისთვის შეთავაზებულ სერვისებსა და საარჩევნო პროცესში ტექნოლოგიების გამოყენების სიახლეებს. 

შეხვედრის მეორე ნაწილი დაეთმო სემინარს „არჩევნები და ახალგაზრდა ამომრჩეველი“, რომლის ფარგლებშიც სწავლების ცენტრის წარმომადგენელმა სკოლის მოსწავლეებს გააცნო საქართველოს არჩევნების ისტორია, დემოკრატიული არჩევნების ჩატარების სტანდარტები, ამომრჩევლის საარჩევნო უფლების რეალიზების გარანტიები, ინკლუზიური საარჩევნო გარემოს მნიშვნელობა და ხელშემწყობი პირობები. მეტი თვალსაჩინოებისთვის მოსწავლეები უშუალოდ ჩაერთნენ საარჩევნო ტექნოლოგიების გამოყენებით ხმის მიცემის სიმულაციაში.

მიმდინარე საინფორმაციო კამპანია მიზნად ისახავს ახალგაზრდა ამომრჩეველთა სამოქალაქო ცნობიერების ამაღლების ხელშეწყობას და იმ ნაწილის გააქტიურებას, რომელიც პირველად მიიღებს მონაწილეობას არჩევნებში.

ცესკო და სწავლების ცენტრი გულითად მადლობას უხდის ქალაქ თბილისის №203-ე საჯარო სკოლის დირექციასა და მოსწავლეებს პროექტში მონაწილეობისთვის.