კვალიფიციური საარჩევნო ადმინისტრატორების შერჩევის პროცესის მხარდასაჭერად, ცესკო და სწავლების ცენტრი 2024 წლის 8 მაისიდან იწყებს საინფორმაციო-სასწავლო პროექტის „საარჩევნო ადმინისტრატორის კურსები“ განხორციელებას. აღნიშნული ინიციატივა სადამკვირვებლო ორგანიზაციების ანგარიშებში ასახულ რეკომენდაციებს ეხმიანება და საარჩევნო რეფორმის შესაბამისად მიზნად ისახავს საარჩევნო ტექნოლოგიურ სიახლეებზე საუბნო საარჩევნო კომისიების პოტენციური საკადრო რესურსის გადამზადებას.
პროექტის განხორციელების არეალი მასშტაბურია, ჩატარდება 64-ვე მუნიციპალიტეტში. საინფორმაციო-სასწავლო კურსში მონაწილეობის მისაღებად 20 700-მდე მოქალაქე დარეგისტრირდა.
მონაწილეები, სწავლების ცენტრის მიერ შემუშავებული პროგრამის ფარგლებში, სწავლებას პროფილურად გაივლიან, ერთ-ერთი შერჩეული კურსის მიხედვით:
პროფილური მიმართულებების შესაბამისად, მონაწილეები მიიღებენ სპეციალიზებულ ცოდნას შემდეგ ძირითად საკითხებზე: საქართველოს პარლამენტის 2024 წლის ოქტომბრის არჩევნების მოდერნიზაციის ტენდენციები; ხმის მიცემის პროცესში ელექტრონული ტექნოლოგიების გამოყენება; ამომრჩევლის საარჩევნო უფლების რეალიზება, ფარულობა და დაცულობა კენჭისყრის პროცესში; ინკლუზიური საარჩევნო გარემოს მნიშვნელობა და საარჩევნო აპარატების გამოყენებით კენჭისყრის პროცესში შშმ ამომრჩევლების დამოუკიდებლად მონაწილეობის ხელშეწყობა.
პროგრამა პრაქტიკული სწავლების კომპონენტს ეფუძნება, მონაწილეები საუბნო საარჩევნო კომისიის საქმიანობის შესაბამისად აპარატების ფუნქციონალს შეისწავლიან და ამ მიზნით სატრენინგო რეჟიმში განახორციელებენ ამომრჩეველთა ვერიფიკაციის აპარატების, ხმის დათვლის სპეციალური ელექტრონული აპარატების, კენჭისყრის წინასწარი შედეგების გადაცემისთვის განკუთვნილი პლანშეტური კომპიუტერების მართვას.
„საარჩევნო ადმინისტრატორის კურსებს“ 170 ტრენერი 2024 წლის 8 მაისიდან 8 ივნისის ჩათვლით პერიოდში ჩაატარებს. ტრენერთა გადამზადება სწავლების ცენტრმა უზრუნველყო, საარჩევნო სისტემების საერთაშორისო ფონდთან (IFES) პარტნიორობით.
