ცენტრალურ საარჩევნო კომისიაში სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოს წარმომადგენლებთან სამუშაო შეხვედრა გაიმართა.
შეხვედრაზე საარჩევნო ადმინისტრაციის 2024 წლის სამოქმედო გეგმით გათვალისწინებული აქტივობის „მხარდაჭერის მიმღები პირების საკითხებზე მომუშავე ადგილობრივი არასამთავრობო ორგანიზაციების წარმომადგენლებისთვის მხარდაჭერის მიმღები პირების კენჭისყრაში მონაწილეობის შესახებ სასწავლო-საინფორმაციო კურსის ჩატარება“ განხორციელების საკითხი განიხილეს.
ცესკოსა და საარჩევნო სისტემების განვითარების, რეფორმებისა და სწავლების ცენტრის წარმომადგენლებმა შეხვედრის მონაწილეებს ელექტრონული საარჩევნო ტექნოლოგიების დანერგვასთან დაკავშირებით საარჩევნო ადმინისტრაციის მიმდინარე საქმიანობა გააცნეს. იმსჯელეს ამ მიმართულებით სააგენტოს დაქვემდებარებაში არსებული დაწესებულებების, შეზღუდული შესაძლებლობების მქონე პირთა საკითხებზე მომუშავე ორგანიზაციებისა და მხარდაჭერის მიმღები პირების ინფორმირების საკითხებზე. ინფორმირება განხორციელდება ცესკოს მიერ პირველად 2024 წელს შემუშავებული არჩევნებში მონაწილეობის გზამკვლევის მიხედვით, რომელიც შექმნილია მხარდაჭერის მიმღები პირებისთვის გასაგებ, მარტივად წასაკითხ ფორმატში. შეხვედრაზე შეთანხმდნენ, რომ სააგენტოს მიერ მოწოდებული შესაბამისი ინფორმაციის საფუძველზე დაიგეგმება, თუ როგორ განხორციელდება ინფორმირების კამპანია.
სამუშაო შეხვედრა 12 აპრილს გაიმართა და მას ცესკოს სტრუქტურული ერთეულებისა და სწავლების ცენტრის ხელმძღვანელები ესწრებოდნენ. აღსანიშნავია, რომ საარჩევნო ადმინისტრაცია ინფორმირების კამპანიას კონკრეტულად შშმ პირთა საკითხებზე მომუშავე ორგანიზაციებისა და მხარდაჭერის მიმღები პირებისთვის, პირველად ახორციელებს.
