ცესკო და სწავლების ცენტრი საქართველოს 64 მუნიციპალიტეტში განლაგებულ 353 საჯარო სკოლაში საინფორმაციო-სასწავლო კურსს „არჩევნები და ახალგაზრდა ამომრჩეველი“ ახორციელებს.

პროექტი მიზნად ისახავს ახალგაზრდების საარჩევნო ცნობიერების ამაღლებას და სამოქალაქო კულტურის განვითარების ხელშეწყობას. საარჩევნო რეფორმის გათვალისწინებით განახლებული პროგრამის ფარგლებში XI-XII კლასის მოსწავლეები მიიღებენ ინფორმაციას არჩევნების მოდერნიზაციისა და ამ მიმართულებით არსებული საერთაშორისო პრაქტიკის შესახებ, კენჭისყრის პროცესის საარჩევნო ტექნოლოგიებით (აპარატებით) ჩატარების სიახლეებსა და ამომრჩევლებისთვის დანერგილი საარჩევნო სერვისების თაობაზე.

საჯარო სკოლებში საინფორმაციო-სასწავლო კურსის ჩატარებას სწავლების ცენტრის მიერ გადამზადებული 101 ტრენერი უზრუნველყოფს. ამომრჩევლის როლის მნიშვნელობის და ხმის მიცემის პროცესის პრაქტიკული ასპექტების განხილვის მიზნებისთვის, მოსწავლეებს შესაძლებლობა ექნებათ, მონაწილეობა მიიღონ კენჭისყრის იმიტირებულ პროცესში.

ქვეყნის მასშტაბით დაგეგმილი პროექტის ჩატარება გათვალისწინებულია 2024 წლის 12-29 თებერვლის ჩათვლით პერიოდში.

პროგრამა საქართველოს განათლებისა და მეცნიერების სამინისტროსთან თანამშრომლობით 2015 წლიდან ხორციელდება. დღემდე საინფორმაციო-სასწავლო კურსი 64 მუნიციპალიტეტში განლაგებული 1353 საჯარო სკოლის XI-XII კლასის 26 000-მდე მოსწავლემ გაიარა.