ცენტრალური საარჩევნო კომისიის (ცესკო) თავმჯდომარე გიორგი კალანდარიშვილმა არჩევნების საერთაშორისო დღესთან დაკავშირებით მრავალწლიანი მუშაობისთვის ცესკოს, საოლქო საარჩევნო კომისიების და სწავლების ცენტრის თანამშრომლებს მადლობა გადაუხადა.
„პირველ რიგში მინდა საარჩევნო ადმინისტრაციის სახელით მადლობა გადავუხადო თანამშრომლებს მრავალი წლის განმავლობაში გაწეული საქმისთვის. ვფიქრობ, ამ ადამიანებს აქვთ მნიშვნელოვანი გამოცდილება, რომელიც პირველ რიგში ინსტიტუციის განვითარებას უწყობს ხელს. საარჩევნო ადმინისტრაციამ ამ ადამიანებთან ერთად წარმატებით გაიარა განვითარების სხვადასხვა, მათ შორის, არჩევნების მოდერნიზებისა და ელექტრონული ტექნოლოგიების პილოტირების უმნიშვნელოვანესი ეტაპი. ასევე აღსანიშნავია, რომ წინ გვაქვს მნიშვნელოვანი წელი - 2024 წელი, რომლის წარმატებით ადმინისტრირებაც იქნება საარჩევნო ადმინისტრაციის თითოეული თანამშრომლის დამსახურება“, - განაცხადა გიორგი კალანდარიშვილმა თანამშრომლებთან საუბრისას.
გიორგი კალანდარიშვილმა გაწეული სამსახურისთვის იმ 130 თანამშრომელს გადაუხადა მადლობა, რომლებიც საარჩევნო ადმინისტრაციაში 10 წელზე მეტია მუშაობენ.
აღსანიშნავია, რომ არჩევნების საერთაშორისო დღე 2005 წლიდან ყოველ წელიწადს, თებერვლის პირველ ხუთშაბათს აღინიშნება. არჩევნების საერთაშორისო დღე რამდენიმე მიზანს ემსახურება, მათ შორის, არჩევნების მნიშვნელობის შესახებ საზოგადოების მაქსიმალური ინფორმირება და ყველა იმ სიახლისა და მოვლენის შესახებ საზოგადოების ცნობიერების ამაღლება, რომელიც არჩევნებს უკავშირდება.
