სახანძრო უსაფრთხოებისა და პირველადი სამედიცინო დახმარების კურსის წარმატებით დასრულებისთვის საარჩევნო ადმინისტრაციის წარმომადგენლებს სერტიფიკატები გადაეცათ.
ღონისძიება 21 ნოემბერს ცენტრალურ საარჩევნო კომისიაში გაიმართა. საარჩევნო ადმინისტრაციის წარმომადგენლებს სერტიფიკატები ცესკოს თავმჯდომარე გიორგი კალანდარიშვილმა და უსაფრთხოების აკადემიის სასწავლო ცენტრის დირექტორმა დავით მაზმიშვილმა გადასცეს.
როგორც გიორგი კალანდარიშვილმა აღნიშნა, საარჩევნო ადმინისტრაციის საქმიანობის ერთ-ერთი პრიორიტეტია თანამშრომლებისათვის უსაფრთხო და ჯანსაღი სამუშაო გარემოს შექმნა. ამ მიზნით, ცესკოს ადამიანური რესურსების მართვისა და შრომის უსაფრთხოების დეპარტამენტის მიერ, საარჩევნო ადმინისტრაციის თანამშრომლებისათვის დაიგეგმა და განხორციელდა სახანძრო უსაფრთხოებისა და პირველადი სამედიცინო დახმარების ტრენინგები.
„ჩვენ ყველა კარგად ვაცნობიერებთ, თუ რა მნიშვნელოვანია ეს სწავლება, რომელიც ერთი მხრივ უზრუნველყოფს ორგანიზაციული კულტურის განვითარებას, ხელშეწყობასა და ჩამოყალიბებას, მეორე მხრივ კი ადასტურებს, რომ შრომის უსაფრთხოება პრიორიტეტული მიმართულებაა უწყებაში და ჩვენს საქმიანობაში. შესაბამისად ამ კუთხით ცნობიერების ამაღლების ხელშეწყობა განსაკუთრებით მნიშვნელოვანია“, - აღნიშნა ცესკოს თავმჯდომარემ.
სახანძრო უსაფრთხოებისა და პირველადი სამედიცინო დახმარების ტრენინგის წარმატებით დასრულებისთვის დღეს სერტიფიკატი ცესკოს აპარატის, სწავლების ცენტრისა და საოლქო საარჩევნო კომისიების 155 წარმომადგენელს გადაეცა. შესაბამისი სასწავლო კურსი მათ ეტაპობრივად, მიმდინარე წლის მაისი-ოქტომბრის პერიოდში გაიარეს.
