2023 წლის 1 ოქტომბერს გასამართი შუალედური და რიგგარეშე არჩევნებისთვის სწავლების ცენტრის მიერ შემუშავებული კონცეფციის შესაბამისად, საუბნო საარჩევნო კომისიების წევრთა ტრენინგები ოთხ ეტაპს მოიცავს.  12 სექტემბრის ჩათვლით პერიოდში განხორციელებული I ეტაპის ტრენინგები საუბნო საარჩევნო კომისიების ხელმძღვანელი პირების ინტენსიურ გადამზადებას დაეთმო, II ეტაპზე კი პრაქტიკული სწავლება საუბნო საარჩევნო კომისიების სხვა წევრებმა გაიარეს.

ამომრჩევლებისთვის კვალიფიციური სერვისის განხორციელებაზე ორიენტირებით შემუშავებული სტრატეგიული გეგმის თანახმად, სწავლების ცენტრმა უზრუნველყო დამატებითი ეტაპის სატრენინგო პროგრამის მომზადება. მასში მონაწილეობის მიღება შეუძლიათ საუბნო საარჩევნო კომისიების შეცვლილ (ახალ) ხელმძღვანელ პირებსა და წევრებს, ასევე იმ საარჩევნო ადმინისტრატორებს, რომლებიც ვერ დაესწრნენ გრაფიკით გათვალისწინებული წინა ეტაპების ტრენინგებს.

დამატებითი ეტაპის სასწავლო პროგრამას სწავლების ცენტრის მიერ გადამზადებული ტრენერები 15 სექტემბერს ჩაატარებენ. მონაწილეებს, მანდატის შესაბამისად, მიეწოდებათ ინფორმაცია კენჭისყრის პროცესში პროფილურად განსახორციელებელი ფუნქციების თაობაზე. პრაქტიკულ სწავლებაზე დაფუძნებით საუბნო საარჩევნო კომისიების ხელმძღვანელი პირები და წევრები განახორციელებენ კენჭისყრის პროცესის ეპიზოდურ ინსცენირებებს. საარჩევნო კომისიებისთვის, სადაც კენჭისყრა ელექტრონული ტექნოლოგიების გამოყენებით წარიმართება, სატრენინგო პროგრამა ითვალისწინებს პროცედურების მოდელირებას ამომრჩეველთა ვერიფიკაციის აპარატების, ხმის დათვლის სპეციალური ელექტრონული აპარატებისა და პლანშეტური კომპიუტერების გამოყენებით. 

დამატებითი ეტაპის ტრენინგების გრაფიკი ხელმისაწვდომია ბმულზე. მასში ცვლილებების განხორციელების შემთხვევაში, ინფორმაცია აისახება დაუყოვნებლივ.

ინფორმაცია II ეტაპის ტრენინგებზე საუბნო საარჩევნო კომისიების წევრთა დასწრების შესახებ იხილეთ ბმულზე.