2023 წლის პირველი ოქტომბრის შუალედური და რიგგარეშე არჩევნებისთვის  სწავლების ცენტრმა საარჩევნო ადმინისტრაციის ტრენერთა გადამზადება დაიწყო. მოსამზადებელი კურსის გავლის შემდგომ ტრენერები შესაბამის საუბნო საარჩევნო კომისიების წევრებს ინტენსიურ სასწავლო პროგრამებს ჩაუტარებენ, რომლის მიზანი საარჩევნო ადმინისტრატორების პროფესიული განვითარება და კენჭისყრის პროცესში ამომრჩევლებისთვის კვალიფიციური მომსახურების განხორციელების ხელშეწყობაა.

როგორც ცნობილია, ამომრჩევლები პირველ ოქტომბერს საქართველოს პარლამენტის გორი-კასპის მაჟორიტარ დეპუტატს და გურჯაანის მერს აირჩევენ. არჩევნებისთვის შექმნილი 133 საარჩევნო უბნიდან 103 უბანზე კენჭისყრა ამომრჩეველთა ვერიფიკაციის და ხმის დათვლის სპეციალური ელექტრონული აპარატების გამოყენებით ჩატარდება, 30 საარჩევნო უბანზე კი არჩევნები ელექტრონული საშუალებების გამოყენების გარეშე გაიმართება. სწორედ აღნიშნულ სიახლეებზე ორიენტირებით და კენჭისყრის ჩატარების პროცედურული სპეციფიკების გათვალისწინებით სწავლების ცენტრმა შეიმუშავა შესაბამისი სასწავლო პროგრამები საუბნო საარჩევნო კომისიებისთვის.

ტრენერთა ტრენინგი ცენტრალური საარჩევნო კომისიის მდივანმა გიორგი ჯავახიშვილმა და სწავლების ცენტრის დირექტორმა ნათია ზაალიშვილმა გახსნეს. მათ საარჩევნო პროცესის ეფექტიანად განხორციელებისთვის საუბნო საარჩევნო კომისიების წევრთა პროფესიული გადამზადების მნიშვნელობაზე ისაუბრეს, ყურადღება გაამახვილეს ელექტრონული ტექნოლოგიების გამოყენებასთან დაკავშირებულ სიახლეებზე და კენჭისყრის საორგანიზაციო/ლოჯისტიკურ საკითხებზე.

სწავლების ცენტრის დირექტორმა შეხვედრის მონაწილეებს დეტალურად გააცნო საუბნო საარჩევნო კომისიების წევრებისთვის შემუშავებული სასწავლო პროგრამების კონცეფციები, რომლის მიხედვით ტრენინგები ოთხ ეტაპად ჩატარდება, აქედან, სამი ეტაპი საუბნო საარჩევნო კომისიების ხელმძღვანელი პირების ინტენსიურ გადამზადებას ეთმობა, ხოლო საუბნო საარჩევნო კომისიების სხვა წევრები პრაქტიკულ სწავლებას ორ ეტაპად გაივლიან:

ამასთან, გათვალისწინებულია დამატებითი ეტაპის ჩატარება, რომელშიც მონაწილეობას მიიღებენ საუბნო საარჩევნო კომისიის შეცვლილი წევრები და ის წევრები, ვინც ვერ დაესწრნენ განვლილი ტრენინგების ეტაპს.

სწავლების ცენტრმა ტრენერთა ტრენინგი 24 აგვისტოს დაიწყო და 31 აგვისტოს ჩათვლით პერიოდში განახორციელებს, რომლის ფარგლებში გადამზადებას 40 ტრენერი გაივლის. მათ მიერ საუბნო საარჩევნო კომისიების წევრთათვის ჩასატარებელი პროცედურული ტრენინგების დეტალური გრაფიკები ტრენინგების დაწყებამდე ცესკოს და სწავლების ცენტრის ვებგვერდებზე გასაჯაროვდება.