2023 წლის 8 მაისს, პროექტისთვის „საარჩევნო ადმინისტრატორის სასწავლო კურსები“ ტრენერთა გადამზადების პროგრამა დაიწყო.

საარჩევნო პროცესში ინტეგრირებული ტექნოლოგიური სიახლეების გაცნობა და სამოქალაქო ცნობიერების ამაღლების ხელშეწყობა - პროექტის ამ მიზნების შესახებ ცესკოს თავმჯდომარის მოადგილემ გიორგი შარაბიძემ და სწავლების ცენტრის დირექტორმა ნათია ზაალიშვილმა ღონისძიების გახსნისას ისაუბრეს. როგორც მათ აღნიშნეს, „საარჩევნო ადმინისტრატორის სასწავლო კურსები“ წარმოადგენს უწყვეტი საგანმანათლებლო პროცესის ერთ-ერთ მნიშვნელოვან კომპონენტს, რომელიც ეხმიანება საარჩევნო ადმინისტრაციის სტრატეგიულ გეგმას და საარჩევნო კულტურის განმტკიცების ხელშეწყობას ითვალისწინებს.

ტრენერთა ტრენინგი 24 მაისის ჩათვლით განხორციელდება. სწავლების ცენტრი უზრუნველყოფს 207 ტრენერის გადამზადებას, რომელთა რესურსი შემდგომ ეტაპზე მიემართება 64 მუნიციპალიტეტში საინფორმაციო-სასწავლო პროგრამის იმპლემენტაციას. პროექტში მონაწილეობას მიიღებენ მოქალაქეები, რომლებიც შესაბამის რეგისტრაციას გაივლიან სპეციალური ელექტრონული პლატფორმის (Konkursi.cec.gov.ge) საშუალებით, ან საოლქო საარჩევნო კომისიებში, მოცემულ ბმულზე ასახული სარეგისტრაციო პირობების მიხედვით: https://tinyurl.com/4t7kxdm7

საინფორმაციო-სასწავლო კურსის ფარგლებში დაინტერესებული პირები მიიღებენ ინფორმაციას ამომრჩეველთა ვერიფიკაციის აპარატის, ხმის ელექტრონული მთვლელი აპარატის ფუნქციონირების საკითხებსა და საუბნო საარჩევნო კომისიის საქმიანობის სხვა მნიშვნელოვან ასპექტებზე.