სსიპ საარჩევნო სისტემების განვითარების, რეფორმებისა და სწავლების ცენტრის (სწავლების ცენტრი) მიერ შემუშავებული ტრენინგების კონცეფციის შესაბამისად, საოლქო საარჩევნო კომისიებთან კოორდინაციით, დაიგეგმა დამატებითი ეტაპის ტრენინგები საუბნო საარჩევნო კომისიების შეცვლილი (ახალი) წევრებისათვის და იმ წევრებისათვის, რომლებიც ვერ დაესწრნენ გრაფიკით გათვალისწინებული II ეტაპის ტრენინგებს.

პროფილური სატრენინგო პროგრამის ფარგლებში მონაწილეები გაეცნობიან საუბნო საარჩევნო კომისიების წევრთა კომპეტენციას მიკუთვნებულ შემდეგ ძირითად საკითხებს:

• საარჩევნო უბნის გახსნიდან კენჭისყრის დაწყებამდე პერიოდში საუბნო საარჩევნო კომისიის თავმჯდომარის საორგანიზაციო უფლებამოსილებები;
• კენჭისყრის დღეს საუბნო საარჩევნო კომისიის წევრებს შორის გასანაწილებელი ფუნქციები და მათი შესრულების ტექნიკა;
• ხმის მიცემის პროცესი საარჩევნო უბანზე და გადასატანი საარჩევნო ყუთით;
• საარჩევნო უბნის დახურვა და საუბნო საარჩევნო კომისიის თავმჯდომარის საორგანიზაციო უფლებამოსილებები ხმის დათვლის პროცედურისთვის მზადების მიმართულებით;
• ხმების დათვლის პროცესის მიზნით საუბნო საარჩევნო კომისიის წევრებს შორის გასანაწილებელი ფუნქციები და მათი შესრულების ტექნიკა.

პრაქტიკულ სწავლებაზე დაფუძნებით საუბნო საარჩევნო კომისიების წევრები განახორციელებენ კენჭისყრის პროცესის ეპიზოდურ ინსცენირებებს. საარჩევნო კომისიებისთვის, სადაც კენჭისყრა ელექტრონული ტექნოლოგიების გამოყენებით წარიმართება, სატრენინგო პროგრამა ითვალისწინებს პროცედურების მოდელირებას ამომრჩეველთა ვერიფიკაციის აპარატებისა და ხმის დათვლის სპეციალური ელექტრონული აპარატების გამოყენებით.

სწავლების ცენტრის მიერ გადამზადებული ტრენერები დამატებითი ეტაპის ტრენინგებს 2023 წლის 23 აპრილს ჩაატარებენ. გრაფიკი ხელმისაწვდომია ბმულზე. მასში ცვლილებების განხორციელების შემთხვევაში, ინფორმაცია აისახება დაუყოვნებლივ.

ინფორმაცია პირველი და მეორე ეტაპის ტრენინგებზე საუბნო საარჩევნო კომისიების წევრთა დასწრების შესახებ იხილეთ ბმულებზე:

I ეტაპის ტრენინგების სტატისტიკა - საუბნო საარჩევნო კომისიის ხელმძღვანელი პირებისთვის.

II ეტაპის ტრენინგების სტატისტიკა - საუბნო საარჩევნო კომისიის სრული შემადგენლობისთვის.