ინფორმაციის თავისუფლების განვითარების ინსტიტუტმა (IDFI),  2020 წელს ჩატარებული კვლევის შედეგების მიხედვით, საარჩევნო სისტემების განვითარების, რეფორმებისა და სწავლების ცენტრი ღია საჯარო დაწესებულებად დაასახელა და სპეციალური სიგელით დააჯილდოვა.

საქართველოში საჯარო ინფორმაციის ხელმისაწვდომობის ხარისხის კვლევის მიზნებისთვის ინფორმაციის თავისუფლების განვითარების ინსტიტუტმა (IDFI) 285 საჯარო დაწესებულება შეაფასა. შედეგების მიხედვით სწავლების ცენტრმა საჯარო ინფორმაციის ხელმისაწვდომობის მაღალი შეფასება მიიღო (მაჩვენებელი - 100%). აღსანიშნავია, რომ სწავლების ცენტრი ამ ჯილდოს მფლობელი უკვე მეექვსედ გახდა (2011 წ, 2015 წ, 2016 წ, 2018 წ, 2019 წ და 2020 წ).

ღონისძიებაზე, რომელიც ინფორმაციის თავისუფლების განვითარების ინსტიტუტის (IDFI) ფეისბუქ გვერდზე პირდაპირი ტრანსლაციის რეჟიმში წარიმართა (იხ. ბმული), გამოვლინდა 2020 წელს ინფორმაციის ხელმისაწვდომობის უზრუნველყოფის 100%-იანი მაჩვენებლის მქონე 19 საჯარო დაწესებულება (დეტალური ანგარიში წარმოდგენილია ბმულზე).

საჯარო ინფორმაციის ხელმისაწვდომობის მონიტორინგი საქართველოში 2010 წლიდან ხორციელდება. 2020 წელს IDFI-ის მიერ ჩატარებული კვლევა შვედეთის საერთაშორისო განვითარების თანამშრომლობის სააგენტოს, Sida-ს მხარდაჭერით განხორციელდა.