სენაკის მუნიციპალიტეტის საკრებულოს შუალედური არჩევნების ელექტრონული ტექნოლოგიების გამოყენებით ჩასატარებლად მზადება გრძელდება.
სინქრონიზებული ვერიფიკაციის აპარატების, ასევე ხმის მიცემისა და დათვლის აპარატების გამოყენებით იმიტირებული კენჭისყრა სენაკში, ერთ-ერთ საარჩევნო უბანზე გაიმართა. იმიტირებულ არჩევნებს ცესკოს აპარატისა და სწავლების ცენტრის წარმომადგენლები აკვირდებოდნენ. იმიტირებული კენჭისყრის პროცესმა წარმატებით ჩაიარა და როგორც საუბნო საარჩევნო კომისიების წევრებმა, ისე ამომრჩევლის სტატუსით მონაწილე პირებმა ელექტრონული ტექნოლოგიები მარტივად გამოიყენეს.
სენაკის საკრებულოს შუალედური არჩევნები 2022 წლის პირველ ოქტომბერს გაიმართება. არჩევნები სამ საარჩევნო უბანზე ჩატარდება. საპილოტე პროექტის ფარგლებში სამივე უბანზე საარჩევნო პროცედურების - ამომრჩევლის ვერიფიკაციის, ხმის მიცემისა და ხმის დათვლის პროცესში გამოყენებული იქნება ელექტრონული ტექნოლოგიები.
აღსანიშნავია, რომ სენაკის არჩევნებზე საარჩევნო ადმინისტრაცია სიახლის სახით პირველად გამოიყენებს სინქრონიზებული ვერიფიკაციის აპარატებს. შესაბამისად, ამომრჩეველს ნებისმიერ თავისუფალ რეგისტრატორთან შეეძლება მისვლა და რეგისტრაციის (ვერიფიკაციის) პროცედურის გავლა. ეს კი თავის მხრივ შეამცირებს საარჩევნო უბნებზე ამომრჩეველთა რიგებს და გაამარტივებს პროცედურას.
შეგახსენებთ, რომ საარჩევნო ადმინისტრაცია 2018 წლიდან წარმატებით ახორციელებს სხვადასხვა მწარმოებლების ელექტრონული საშუალებების პილოტირებას.
