საქართველოში ვიზიტით მყოფი მოლდოვას საარჩევნო ადმინისტრაციის დელეგაცია ცენტრალური საარჩევნო კომისიის (ცესკო) წარმომადგენლებთან შეხვედრებს განაგრძობს. დღეს მათ ცესკოს იურიდიული დეპარტამენტის უფროსი გიორგი სანტურიანი შეხვდა და ინფორმაცია ისეთ მნიშვნელოვან საკითხზე მიაწოდა, როგორიცაა ონლაინ სერვისების გამოყენება საარჩევნო დავების განხილვისას.

მოლდოვას საარჩევნო ადმინისტრაციის წარმომადგენლები ცესკოს გენდერული თანასწორობის საბჭოს საქმიანობასაც გაეცნენ. საქართველოს საარჩევნო ადმინისტრაციის გენდერული თანასწორობის საბჭოს პოლიტიკა და ის აქტივობები, რომელიც ამ მიმართულებით ხორციელდება მოლდოველ კოლეგებს გენდერული საბჭოს თავმჯდომარემ, ცესკოს წევრმა მაია ზარიძემ წარუდგინა.

საარჩევნო სისტემების განვითარების, რეფორმებისა და სწავლების ცენტრის დირექტორის მოადგილემ ნინო ბერულავამ და სასწავლო პროგრამების სამსახურის უფროსმა მაია გუდაძემ მოლდოვას საარჩევნო ადმინისტრაციის დელეგაციას დეტალურად გააცნეს სწავლების ცენტრის საქმიანობის სხვადასხვა პრაქტიკული ასპექტები, მათ შორის, საარჩევნო ადმინისტრაციის მოხელეთა სასერტიფიკაციო გამოცდის ადმინისტრირების პროცესი,  საქართველოს უნივერსიტეტებსა და საჯარო სკოლებში საარჩევნო განათლების მიმართულებით დანერგილი სწავლების ცენტრის პროგრამები.

შეხვედრები, რომლის ფარგლებში საქართველოს საარჩევნო ადმინისტრაცია გამოცდილებას მოლდოვას საარჩევნო ადმინისტრაციას უზიარებს ევროსაბჭოსთან (CoE) მჭიდრო თანამშრომლობით გაიმართა.