25 ივლისიდან ცენტრალური საარჩევნო კომისია (ცესკო) იწყებს საგანმანათლებლო საარჩევნო პროექტს „ახალგაზრდული ბანაკები“, რომლის ფარგლებშიც 21-დან 29 წლის ასაკის ახალგაზრდებს შესაძლებლობა აქვთ გაიარონ ოთხდღიანი სასწავლო კურსი და მიიღონ ცოდნა საარჩევნო თემებზე.

ახალგაზრდული ბანაკების მონაწილეებს შესაძლებლობა ექნებათ მიიღონ ინფორმაცია ისეთ მნიშვნელოვან საკითხებზე, როგორებიცაა: არჩევნების ისტორია, დემოკრატიული საარჩევნო პროცესის სახელმძღვანელო პრინციპები (მათ შორის ხმის მიცემის ფარულობის პრინციპი), საარჩევნო სისტემები, საარჩევნო ადმინისტრაციის მოდელები, ინკლუზიური საარჩევნო გარემო, ხმის მიცემის ელექტრონული საშუალებები, გენდერი და არჩევნები, აბსენტეიზმი, პერსონალური მონაცემების დაცვა, არჩევნების უსაფრთხოება, მედიასთან კომუნიკაცია, დეზინფორმაცია, დებატების კულტურა და სხვა მნიშვნელოვანი საკითხები.

პროექტის მონაწილეები შესაბამის საკითხებზე ინფორმაციას მიიღებენ  საარჩევნო ადმინისტრაციის ტრენერების, სწავლების ცენტრის წარმომადგენლების და  მოწვეული ექსპერტებისგან.

საგანმანათლებლო საარჩევნო პროგრამაში გათვალისწინებულია კულტურულ-შემეცნებითი ღონისძიებების განხორციელებაც.

„ახალგაზრდული ბანაკები“  ჩატარდება დაბა ბაკურიანში. მონაწილეთა ტრანსპორტირებას,  სასტუმროში (ბანაკში) განთავსებასა და კვებას უზრუნველყოფს ცენტრალური საარჩევნო კომისია.

სასწავლო კურსის გავლის მსურველები უნდა დარეგისტრირდნენ სპეციალური ელექტრონული პლატფორმის (Konkursi.cec.gov.ge) საშუალებით 11 ივლისიდან 18 ივლისის 24:00 სთ-მდე (დასვენების და უქმე დღეების ჩათვლით); შევსებულ აპლიკაციას თან უნდა ერთვოდეს პირადობის დამადასტურებელი დოკუმენტის (პირადობის მოწმობა, პასპორტი) ფოტო ასლი. მონაწილეთა შერჩევისას გათვალისწინებული იქნება გენდერული ბალანსი.

დამატებითი ინფორმაციის საჭიროების შემთხვევაში დაგვიკავშირდით:  2 51 00 51.

საგანმანათლებლო საარჩევნო პროექტს „ახალგაზრდული ბანაკები“ ცესკო 2020 წლიდან ახორციელებს და მისი მიზანია არჩევნების პოპულარიზაცია და საარჩევნო პროცესებისადმი მონაწილეთა ინტერესის გაღრმავება, ასევე ახალგაზრდების ცნობიერების ამაღლება მოქალაქეობრივი უფლებებისა და საყოველთაოდ აღიარებული პრინციპების შესახებ