საარჩევნო ადმინისტრაციის თანამშრომელთა პროფესიული განვითარების პოლიტიკის გათვალისწინებით, ცენტრალური საარჩევნო კომისია (ცესკო) და საარჩევნო სისტემების განვითრების, რეფორმებისა და სწავლების ცენტრი (სწავლების ცენტრი), საარჩევნო ადმინისტრაციაში ახლად დანიშნული/არჩეული თანამშრომლებისთვის (ცესკოს აპარატის თანამშრომელი, საოლქო საარჩევნო კომისიის წევრი, სტაჟიორი) საორიენტაციო-სასწავლო პროგრამებს ახორციელებს.

2022 წლის 7 ივნისს, საორიენტაციო სწავლება ცესკოს აპარატის 16 თანამშრომელს ჩაუტარდა, რომლებიც საქმიანობას შემდეგ სტრუქტურულ ერთეულებში განახორციელებენ: ცესკოს სტრატეგიული კომუნიკაციების დეპარტამენტის საინფორმაციო - ანალიტიკური განყოფილება; საარჩევნო პროცესების მართვის დეპარტამენტი; იურიდიული დეპარტამენტი; კოორდინაციის, დაგეგმვისა და ანგარიშგების დეპარტამენტი; ცესკოს მდივნის აპარატის საქმისწარმოების განყოფილება.

სწავლების ცენტრის თანამშრომელმა „საარჩევნო ადმინისტრაციისა და საარჩევნო პროცედურების შესახებ“ საორიენტაციო სასწავლო კურსის ფარგლებში მონაწილეებთან შემდეგი ძირითადი საკითხები განიხილა: საქართველოში არჩევნების ისტორიული ექსკურსი; არჩევნების მართვის ორგანოების საერთაშორისო მოდელები და საქართველოს საარჩევნო ადმინისტრაციის სტრუქტურა, უფლებამოსილებები; საარჩევნო ციკლის მართვა და კენჭისყრის დღე; საარჩევნო ადმინისტრაციის მოხელის მანდატი და ეთიკის კოდექსი; დეზინფორმაციის და სიძულვილის ენის უარყოფითი გავლენა საარჩევნო პროცესებზე. ცესკოს ადამიანური რესურსების მართვის დეპარტამენტის წარმომადგენელმა კი მონაწილეებს პერსონალის ფუნქციონალური გეგმის ჭრილში შრომითი ურთიერთობების მართვის კონცეფცია, შიდანორმატიული აქტები (რეგლამენტი, შინაგანაწესი) და საარჩევნო ადმინისტრაციის ორგანიზაციული კულტურის პრინციპები გააცნო.

საორიენტაციო-სასწავლო პროგრამები ხელს უწყობს ახლად დანიშნული/არჩეული თანამშრომლების სოციალიზაციის პროცესის წარმატებით გავლას, კორპორატიული განწყობის ჩამოყალიბებას და ქმნის თანამშრომლის პროფესიული საქმიანობით დადებითი შედეგების მიღების საფუძველს.