ცენტრალური საარჩევნო კომისია და საარჩევნო სისტემების განვითარების, რეფორმებისა და სწავლების ცენტრი პარტნიორ უნივერსიტეტებში სხვადასხვა ფაკულტეტის დაწყებითი კურსის სტუდენტებთან სემინარების ციკლს აგრძელებს.
საინფორმაციო შეხვედრა თემაზე „ინფორმირებული ახალგაზრდა ამომრჩეველი“ ამჯერად კავკასიის საერთაშორისო უნივერსიტეტის სტუდენტებთან ჩატარდა. შეხვედრა ცესკოს თავმჯდომარემ გიორგი კალანდარიშვილმა და ცესკოს სწავლების ცენტრის ხელმძღვანელმა ნათია ზაალიშვილმა გახსნეს. მისასალმებელ სიტყვაში ცესკოს თავმჯდომარემ დეტალურად ისაუბრა ქვეყნის დემოკრატიული განვითარების ამოცანის წარმატებით შესასრულებლად, რეფორმების პარალელურად, საარჩევნო კულტურის განმტკიცების მნიშვნელობაზე, სწავლების ცენტრის დირექტორმა კი ამ მიმართებით ინფორმირებული ამომრჩევლის როლზე და საარჩევნო ცნობიერების ამაღლებაზე ორიენტირებული პროგრამების უწყვეტად განხორციელების აუცილებლობაზე გაამახვილა ყურადღება.
შეხვედრის მეორე ნაწილში სწავლების ცენტრის ტრენერმა სემინარი ჩაატარა. სტუდენტებმა ინფორმაცია მიიღეს დემოკრატიული არჩევნების საერთაშორისო სტანდარტებსა და ამომრჩევლის საარჩევნო უფლების რეალიზების გარანტიებზე, მათ შორის, ინკლუზიური საარჩევნო გარემოს მნიშვნელობასა და ხელშემწყობ პირობებზე. შეხვედრაზე საარჩევნო ტექნოლოგიებიც განიხილეს და სტუდენტები დეტალურად გაეცნენ ინფორმაციას საარჩევნო ადმინისტრაციის მიერ განხორციელებულ საპილოტე პროექტზე, რომელიც საარჩევნო პროცესებში ელექტრონული ტექნოლოგიების გამოყენებას გულისხმობს.
სემინარები სტუდენტებთან საინფორმაციო-სასწავლო კამპანიის „ახალგაზრდების ჩართულობის ხელშეწყობა ღია მმართველობის პროცესში“ ფარგლებში ხორციელდება და ორიენტირებულია არჩევნების პოპულარიზაციაზე, ახალგაზრდების აქტიურ და ინფორმირებულ ამომრჩევლებად ჩამოყალიბების ხელშეწყობაზე.
