ზოგადი ადმინისტრაციული სამართალი, საარჩევნო დავებთან დაკავშირებული ადმინისტრაციული წარმოება და სამართლებრივი წერა - ეს ის საკითხებია, რომლებზეც საოლქო საარჩევნო კომისიის წევრებს ტრენინგი უტარდებათ.
ტრენინგში მონაწილეობას საოლქო საარჩევნო კომისიების სრული შემადგენლობა იღებს და სწავლებას როგორც უშუალოდ ცესკოს იურიდიული დეპარტამენტის, ისე საარჩევნო სისტემების განვითარების, რეფორმებისა და სწავლების ცენტრის ტრენერები ახორციელებენ.
ტრენინგი ცესკოს თავმჯდომარემ სწავლების ცენტრის დირექტორთან და სხვა ხელმძღვანელ პირებთან ერთად გახსნა. როგორც გიორგი კალანდარიშვილმა აღნიშნა, საოლქო საარჩევნო კომისიების საქმიანობაში იურიდიული საკითხების ზედმიწევნით სწორად განხორციელება უმნიშვნელოვანესი საკითხია და საარჩევნო ადმინისტრაციის ხელმძღვანელობა ყველაფერს აკეთებს იმისთვის, რომ ამ კუთხით საოლქო საარჩევნო კომისიების კომპეტენცია კიდევ უფრო გაუმჯობესდეს.
სწავლება ეტაპობრივად ხორციელდება, ის 2 მაისს დაიწყო და ივნისში დასრულდება. ტრენინგს საარჩევნო ადმინისტრაცია საარჩევნო სისტემების საერთაშორისო ფონდთან (IFES) თანამშრომლობით ახორციელებს.
