ცენტრალური საარჩევნო კომისია (ცესკო) საარჩევნო პროცესებში ახალგაზრდების ჩართულობის ხელშეწყობის მიზნით საინფორმაციო შეხვედრებს აგრძელებს. ახალგაზრდების საარჩევნო ცნობიერების ამაღლების მიზნით ცესკომ მინდობით აღზრდაში მყოფ და ბავშვთა სოფლების ბენეფიციარებს უმასპინძლა.

შეხვედრა ცესკოს თავმჯდომარემ გიორგი კალანდარიშვილმა გახსნა და დეტალურად ისაუბრა ქვეყნის დემოკრატიულ განვითარებაში არჩევნების მნიშვნელობისა და საარჩევნო პროცესის შესახებ. მან საარჩევნო ტექნოლოგიებზეც გაამახვილა ყურადღება და სტუდენტებს გააცნო ინფორმაცია საპილოტე პროექტის შესახებ, რომელიც საარჩევნო პროცესებში ელექტრონული ტექნოლოგიების დანერგვას გულისხმობს. გიორგი კალანდარიშვილის თქმით, მსგავსი ტიპის შეხვედრები მნიშვნელოვნად უწყობს ხელს ახალგაზრდების  დაინტერესებას და ჩართულობას საარჩევნო პროცესში.

შეხვედრის მეორე ნაწილი იმიტირებულ არჩევნებს დაეთმო. იმიტირებული კენჭისყრა ცესკოს საარჩევნო სისტემების განვითარების, რეფორმებისა და სწავლების ცენტრის ტრენერებმა ჩაატარეს, რომელშიც ახალგაზრდებმა, როგორც ამომრჩევლებმა მიიღეს მონაწილეობა.

შეხვედრა სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოსთან თანამშრომლობით 3 მაისს ცესკოში გაიმართა.