ცენტრალურ საარჩევნო კომისიაში (ცესკო) საარჩევნო ადმინისტრაციის ტრენერთა პროფესიული გადამზადების პროგრამა დაიწყო.

სასწავლო პროგრამა „ტრენერის პროფესიული უნარები და ონლაინ-სწავლების რესურსების გამოყენების ტექნიკა“  დღეს  ცესკოს თავმჯდომარე გიორგი კალანდარიშვილმა და საარჩევნო რეფორმების, განვითარებისა და სწავლების ცენტრის (სწავლების ცენტრი) დირექტორმა ნათია ზაალიშვილმა გახსნეს, რომლებმაც ტრენერთა საკადრო რესურსის პროფესიული უნარების უწყვეტი განვითარების მნიშვნელობაზე ისაუბრეს. ამ მიზნით სწავლების ცენტრმა განახლებული პროგრამა შეიმუშავა, რომელიც, სპეციალიზებული კურსის ფარგლებში, თანამედროვე გამოწვევებიდან გამომდინარე, ტრენინგების დისტანციურად ჩატარების მიმართულებით სწავლების კომპონენტის გაძლიერებას ითვალისწინებს.

ტრენერთა გადამზადების პროგრამას სწავლების ცენტრი ახორციელებს. ტრენინგში საოლქო საარჩევნო კომისიების წევრები და ცესკოს აპარატის თანამშრომლები მონაწილეობენ. 9 ჯგუფად დაკომპლექტებული 180-მდე მონაწილე, დისტანციურ და პირისპირ ტრენინგების ფორმატში, ინტენსიურ სწავლებას გადიან შემდეგ საკითხებზე: ტრენინგის დაგეგმვა და სტრუქტურა; ტრენინგის პროგრამის დიზაინი; ტრენინგის ჩატარების მეთოდოლოგია; ონლაინ რესურსების გამოყენების ტექნიკა (Zoom; Mentimeter; Kahoot.com); ტრენერის სახელმძღვანელოს/გზამკვლევის შედგენისა და გამოყენების ტექნიკა; პრეზენტაციის წარდგენა და სხვა პროფესიული უნარ-ჩვევები; ტრენინგის შეჯამება/შეფასების მექანიზმები.

ტრენერთა ტრენინგს 14 თებერვლიდან 11 მარტის ჩათვლით პერიოდში სწავლების ცენტრის წარმომადგენლები ჩაატარებენ.