საქართველოს საარჩევნო ადმინისტრაციის 2022 წლის სამოქმედო გეგმის პროექტი განიხილეს სამუშაო შეხვედრაზე ცენტრალური საარჩევნო კომისიის (ცესკო) ხელმძღვანელებმა,  წევრებმა, სტრუქტურული ერთეულების და სწავლების ცენტრის ხელმძღვანელმა პირებმა.  

შეხვედრა ცესკოს თავმჯდომარე გიორგი კალანდარიშვილმა და საარჩევნო სისტემების საერთაშორისო ფონდის (IFES) საქართველოს ოფისის ხელმძღვანელმა ქეთი მაისურაძემ გახსნეს.

ცესკოს სტრუქტურული ერთეულების ხელმძღვანელმა პირებმა და საარჩევნო სისტემების განვითარების, რეფორმებისა და სწავლების ცენტრის დირექტორმა 2021 წელს შესრულებული საქმიანობის შესახებ შემაჯამებელი ანგარიშები წარადგინეს. სამუშაო შეხვედრის ძირითადი ნაწილი კი საარჩევნო ადმინისტრაციის 2022 წლის სამოქმედო გეგმის პროექტის დეტალურ განხილვას დაეთმო. აღნიშნული გეგმის პროექტი საქართველოს ცენტრალური საარჩევნო კომისიის მიერ განსაზღვრული საქმიანობების ერთობლიობას წარმოადგენს და ეფუძნება საარჩევნო ადმინისტრაციის 2020-2023 წლების სტრატეგიულ გეგმას, რომელიც თავის მხრივ შემდეგ პრიორიტეტებს მოიცავს: საარჩევნო კულტურა და განათლება; არჩევნების სანდოობა და უსაფრთხოება; საარჩევნო სერვისები და ტექნოლოგიები; ინკლუზიური საარჩევნო გარემო; მართვის ეფექტიანობა და ინსტიტუციური გაძლიერება.

სამუშაო შეხვედრა 8-10 დეკემბერს საარჩევნო სისტემების საერთაშორისო ფონდთან (IFES)თანამშრომლობით გაიმართა.