საინფორმაციო შეხვედრა გაიმართა დღეს ყრუ და სმენადაქვეითებულ ამომრჩევლებთან კენჭისყრის დღის პროცედურების შესახებ.
შეხვედრა ცენტრალური საარჩევნო კომისიის (ცესკო) თავმჯდომარე გიორგი კალანდარიშვილმა, საარჩევნო სისტემების განვითარების, რეფორმებისა და სწავლების ცენტრის დირექტორმა ნათია ზაალიშვილმა და ყრუთა კავშირის თავმჯდომარე ამირან ბატატუნაშვილმა გახსნეს. ცესკოს თავმჯდომარის განცხადებით, საარჩევნო ადმინისტრაციის მიზანია შექმნას ინკლუზიური საარჩევნო გარემო და თითოეულ ამომრჩეველს თანაბრად უნდა ჰქონდეს არჩევნებში მონაწილეობის საშუალება.
შეხვედრაზე ცესკოს სწავლების ცენტრის ტრენერმა ყრუ და სმენადაქვეითებულ პირთა არჩევნებში მონაწილეობასთან დაკავშირებით პრეზენტაცია წარადგინა და მონაწილეებს კენჭისყრის დღის პროცედურებთან ერთად მათთვის მისაწვდომი სერვისების შესახებ მიაწოდა ინფორმაცია. საინფორმაციო შეხვედრის მონაწილეები ასევე გაეცნენ ინფორმაციას ცესკოს საპილოტე პროექტის შესახებ, რომელიც 2 ოქტომბერს №4 კრწანისის საარჩევნო ოლქში განხორციელდება და რომლის ფარგლებშიც აღნიშნულ ოლქში არჩევნები ელექტრონული ტექნოლოგიების გამოყენებით ჩატარდება.
საინფორმაციო შეხვედრა ცესკოში არსებული შშმ პირთა საკითხებზე მომუშავე სამუშაო ჯგუფის ინიციატივით, დისტანციურად, „Zoom“-ის პლატფორმის გამოყენებით გაიმართა.
