14 სექტემბერს, ცესკოს, სწავლების ცენტრისა და საჯარო სამსახურის ბიუროს ხელმძღვანელ პირებს შორის სამუშაო შეხვედრა გაიმართა.
შეხვედრის ფარგლებში ყურადღება გამახვილდა საარჩევნო პროცესის მიმდინარეობისას საჯარო უწყებებში ადმინისტრაციული რესურსებისა და თანამდებობრივი/სამსახურებრივი მდგომარეობის არამართლზომიერად გამოყენების პრევენციის მნიშვნელობაზე. ამ მიმართულებით ცესკოს თავმჯდომარემ გიორგი კალანდარიშვილმა და საჯარო სამსახურის ბიუროს უფროსმა ეკატერინე ქარდავამ საჯარო მოსამსახურეების ცნობიერების ამაღლების უზრუნველსაყოფად კომპეტენციის ფარგლებში განსახორციელებელი თანამშრომლობის მექანიზმები განიხილეს.
სწავლების ცენტრის დირექტორმა ნათია ზაალიშვილმა შეხვედარზე წარადგინა საჯარო მოსამსახურეების ინფორმირების მიზნებისთვის განახლებული დისტანციური საინფორმაციო-სასწავლო კურსი „საარჩევნო კამპანია და ადმინისტრაციული რესურსი - საარჩევნო პროცესებში ადმინისტრაციული რესურსის არამართლზომიერად გამოყენების პრევენცია და რეაგირება დარღვევებზე“. პროგრამა ეფუძნება საკანონმდებლო სიახლეებს და „2021 წლის 2 ოქტომბრის არჩევნებისთვის ადმინისტრაციული რესურსების გამოყენების შესახებ“ ცესკოს, თავისუფალი და სამართლიანი არჩევნებისთვის უწყებათაშორის კომისიას და ადგილობრივ არასამთავრობო ორგანიზაციებს შორის, 2021 წლის 8 სექტემბერს, გაფორმებულ ურთიერთშეთანხმების მემორანდუმს.
საჯარო სამსახურის ბიურომ გამოთქვა მზაობა, ინიცირებული თანამშრომლობის ფარგლებში, ხელი შეუწყოს საჯარო მოსამსახურეების საინფორმაციო-სასწავლო პროგრამაში ჩართულობას და ამ მიზნით უზრუნველყოს სასწავლო რესურსის შესახებ ინფორმაციის დაყვანა სახელმწიფო უწყებებში, ცენტრალურ და მუნიციპალურ დონეზე.
დღევანდელ შეხვედრას ასევე ესწრებოდა ცესკოს თავმჯდომარის მოადგილე გიორგი სიორიძე და საჯარო სამსახურის ბიუროს უფროსის მოადგილე ირინა აღაპიშვილი.
ცესკომ, სწავლების ცენტრმა და საჯარო სამსახურის ბიურომ სამუშაო ფორმატში სამომავლო თანამშრომლობის პერსპექტივებიც განიხილეს.
