ცენტრალური საარჩევნო კომისიისა და სწავლების ცენტრის ხელმძღვანელი პირები საარჩევნო სისტემების საერთაშორისო ფონდის (IFES) ევროპისა და ევრაზიის რეგიონულ დირექტორს ბეატა მარტინ-როზუმილოვიჩს და ორგანიზაციის საქართველოს წარმომადგენლობის ხელმძღვანელს ქეთი მაისურაძეს შეხვდნენ.
მხარეებმა 2021 წლის ადგილობრივი თვითმმართველობის ორგანოთა არჩევნებზე ახალი ტექნოლოგიების შესაძლო გამოყენებასთან დაკავშირებული საკითხები განიხილეს. საუბარი შეეხო როგორც დადებით მოლოდინებს, ისე იმ გამოწვევებს, რაც აღნიშნული ტექნოლოგიების დანერგვასთან არის დაკავშირებული. როგორც შეხვედრაზე აღინიშნა, ამ კუთხით განსაკუთრებული მნიშვნელობა ენიჭება პროცესის გამჭვირვალობას, ჩართულ მხარეებთან კომუნიკაციას და გადაწყვეტილების მიღების თვალსაზრისით მაქსიმალურ კონსესუსს; ასევე, კომისიის წევრთა სწავლებას, ამომრჩეველთა ინფორმირებას და ცნობიერების ამაღლებას.
როგორც შეხვედრის დასასრულს IFES-ის წარმომადგენლებმა განაცხადეს, ორგანიზაცია მზად არის საპილოტე პროექტების განხორციელების ფარგლებში მჭიდრო თანამშრომლობისთვის, ზემოაღნიშნულ პროცესში აქტიური ჩართულობისა და ტექნიკური მხარდაჭერისთვის.
