სწავლების ცენტრის მიერ 2020 წლის 6 თებერვალს გამოცხადებული საგრანტო კონკურსის ფარგლებში საგრანტო საკონკურსო კომისიის გადაწყვეტილებით დაფინანსებულმა 30 არასამთავრობო ორგანიზაციამ დაიწყო საგრანტო პროექტების განხორციელება შემდეგი მიმართულებით:
პირველ მიმართულებაზე დაფინანსებული ოცდაერთი არასამთავრობო ორგანიზაციის მიერ წარმოდგენილი საგრანტო პროექტები ითვალისწინებს ისეთი მნიშვნელოვანი საინფორმაციო-სასწავლო პროგრამების განხორციელებას, რომელიც უზრუნველყოფს ადამიანური რესურსის გაძლიერებას პოლიტიკური პარტიებისთვის, რომლებიც კანონმდებლობის შესაბამისად არჩევნებისთვის აღიჭურვებიან უფლებით დანიშნონ წევრები ან/და წარმომადგენლები საოლქო და საუბნო საარჩევნო კომისიებში.
პროექტები განხორციელდება ქვეყნის მასშტაბით (თბილისი, კახეთი, ქვემო ქართლი, შიდა ქართლი, მცხეთა-მთიანეთი, სამცხე-ჯავახეთი, იმერეთი, რაჭა-ლეჩხუმი და ქვემო სვანეთი, სამეგრელო და ზემო სვანეთი, გურია და აჭარა) 2020 წლის 15 ივნისიდან - 14 სექტემბრის პერიოდში.
მეორე მიმართულებაზე დაფინანსებული ცხრა არასამთავრობო ორგანიზაციის მიერ წარმოდგენილი საგრანტო პროექტები ითვალისწინებს ახალგაზრდა ამომრჩევლების სამოქალაქო განათლების უზრუნველყოფის ინიციატივას შემდეგ ძირითად საკითხებზე: საქართველოში სახელმწიფო მოწყობისა და არჩევითი ორგანოების ფორმირების წესი; ელექტორატსა და მის მიერ არჩეულ ინსტიტუციებს შორის ანგარიშვალდებულება; დემოკრატიული საარჩევნო პროცესის სახელმძღვანელო პრინციპები; ამომრჩევლის პერსონალური მონაცემების დაცვა საარჩევნო პროცესში; გენდერულ თანასწორობა არჩევნებში; ინკლუზიური საარჩევნო გარემო; არჩევნების პოპულარიზაციასა და სამოქალაქო პასუხისმგებლობის ზრდაზე მიმართულ სხვა საკითხები.
დაფინანსებული საგრანტო პროექტები განხორციელდება რვა რეგიონში (თბილისი, კახეთი, ქვემო ქართლი, შიდა ქართლი, სამცხე-ჯავახეთი, იმერეთი, გურია და აჭარა) 2020 წლის 15 ივნისი - 14 აგვისტოს პერიოდში.
პროექტების ფარგლებში პირველ ეტაპზე ჩასატარებელი ღონისძიებების გრაფიკი (15 ივნისი - 15 ივლისი) განთავსებულია პროექტების რუკაზე. შემდგომი ეტაპის ღონისძიებები გრაფიკში აისახება ეტაპობრივად. გრაფიკი ასევე მოიცავს ინფორმაციას განხორციელებული ცვლილებების შესახებ.
