სასწავლო პროექტში „საარჩევნო ადმინისტრატორის კურსები - საუბნო საარჩევნო კომისიების პოტენციური წევრებისთვის“ მონაწილეობის მსურველთა რეგისტრაცია დასრულდა. 2020 წლის 16 მარტიდან 27 მარტის ჩათვლით პერიოდში, ქვეყნის მასშტაბით 73 საოლქო საარჩევნო კომისიაში 11 500-მდე განაცხადი შემოვიდა.
პროექტის ფარგლებში სწავლების ცენტრის მიერ შემუშავებული საინფორმაციო-სასწავლო კურსი ითვალისწინებს მოქალაქეთა პროფილურ სწავლებას კენჭისყრის დღის პროცედურებისა და საუბნო საარჩევნო კომისიის კომპეტენციას მიკუთვნებულ საკითხებზე, რაც მიზნად ისახავს საარჩევნო სამოქალაქო ცნობიერების ამაღლებასა და საარჩევნო ადმინისტრაციის კვალიფიციური საკადრო რესურსის ფორმირების ხელშეწყობას.
ზემოაღნიშნული ინიციატივის ფარგლებში ტრენინგების განხორციელება გათვალისწინებული იყო 2020 წლის 28 აპრილიდან 29 მაისის ჩათვლით პერიოდში, პროგრამაში მონაწილეობის მსურველი პირების მიერ დოკუმენტაციის წარდგენის ადგილების მიხედვით, საოლქო საარჩევნო კომისიების სამოქმედო ტერიტორიებზე, თუმცა ჯანმრთელობის დაცვის მსოფლიო ორგანიზაციისა და საქართველოს მთავრობის რეკომენდაციების საფუძველზე ახალი კორონავირუსის გავრცელების პრევენციის მიზნით მიღებული ზომებიდან გამომდინარე, სასწავლო პროექტის განხორციელება ამ ეტაპისთვის 2020 წლის მაისი-ივნისის პერიოდისთვის გადაიდო.
საინფორმაციო-სასწავლო კურსის განხორციელების თარიღების დაზუსტების შემდგომ, ტრენინგების გრაფიკები განთავსდება სწავლების ცენტრისა და ცესკოს ვებგვერდებზე. პროგრამისთვის შერჩეული მონაწილეების ინფორმირებასა და ტრენინგებზე მოწვევას უზრუნველყოფენ საოლქო საარჩევნო კომისიები.
