ცენტრალურმა საარჩევნო კომისიამ (ცესკო) სომხეთის საარჩევნო ადმინისტრაციის წარმომადგენლებს უმასპინძლა. ორდღიანი ვიზიტის ფარგლებში ცესკოს წარმომადგენლებმა სომხეთის დელეგაციას საკუთარი გამოცდილება გაუზიარეს.
დელეგაციის წევრები, რომლის შემადგენლობაშიც შედიოდნენ სომხეთის საარჩევნო ადმინისტრაციის მდივანი, წევრი, აპარატის თანამშრომლები და სომხეთში გაეროს განვითარების პროგრამის წარმომადგენლები, შეხვდნენ ცესკოს ხელმძღვანელ პირებს, ასევე ცესკოს იურიდიული დეპარტამენტის, ამომრჩეველთა სიებისა და საარჩევნო პროცესების მართვის დეპარტამენტის და საარჩევნო კომისიებთან ურთიერთობის დეპარტამენტების უფროსებს.
შეხვედრაზე მხარეებმა განიხილეს საარჩევნო ადმინისტრაციების სტრატეგიული დაგეგმარების პროცესი, საარჩევნო დავების განხილვა, არჩევნების ორგანიზება და ასევე ახალი ტექნოლოგიები საარჩევნო პროცესებში.
რაც შეეხება ცესკოს 2020-2023 წლების სტრატეგიული გეგმის პროექტს, ამის შესახებ სომეხ კოლეგებს ინფორმაცია ცესკოს პრეს-სპიკერმა და სტრატეგიული დაგეგმარების გუნდის ხელმძღვანელმა ანა მიქელაძემ წარუდგინა. მან ჯგუფის წევრებთან დეტალურად განიხილა სტრატეგიული გეგმის პროექტის ძირითადი მიმართულებები.
დელეგაციის წევრებმა შეხვედრა გამართეს სწავლების ცენტრის ხელმღვანელ ნათია ზაალიშვილსა და ცენტრის წარმომადგენლებთან, სადაც სწავლების ცენტრის შესაძლებლობებსა და ეფექტურობაზე იმსჯელეს.
ჯგუფის წევრებმა ცესკოში არსებული ისტორიული ფოტო-გამოფენა დაათვალიერეს და ცესკოს ბიბლიოთეკაც მოინახულეს.
16-17 დეკემბერს, სომხეთის ცენტრალური საარჩევნო კომისიის ოფიციალური ვიზიტი გაეროს განვითარების პროგრამის, „არჩევნების ხელშეწყობის პროექტი სომხეთში“, ფარგლებში გაიმართა.
