ევროპის საბჭოსა (CoE) და ვენეციის კომისიის მიერ ორგანიზებულ საერთაშორისო სემინარზე სახელწოდებით - „საარჩევნო დავების განხილვა საქართველოში: გამოწვევები და სამომავლო ნაბიჯები“ ცენტრალური საარჩევნო კომისიის (ცესკო) თავმჯდომარის მოადგილე გიორგი შარაბიძე მოხსენებით წარდგა. გიორგი შარაბიძემ თავის გამოსვლაში ყურადღება გაამხვილა საქართველოში საარჩევნო დავების კუთხით არსებულ გამოწვევებსა და წარმატებულ გამოცდილებაზე, ასევე საარჩევნო ადმინისტრაციის მიერ ამ მიმართულებით განხორციელებულ და დაგეგმილ აქტივობებზე.

ღონისძიებაზე, მთავარ მომხსენებლებს შორის იყვნენ ადამიანის უფლებათა ევროპული სასამართლოს იურისტი და ირლანდიის გენერალური პროკურატურის წარმომადგენელი, ვენეციის კომისიის წევრი და მათ შეხვედრაზე, საარჩევნო დავების განხილვის საერთაშორისო სტანდარტებსა და კარგ პრაქტიკაზე იმსჯელეს.

29 ნოემბერს გამართულ სემინარს ცესკოს წარმომადგენლებთან ერთდ სწავლების ცენტრის დირექტორი ნათია ზაალიშვილიც დაესწრო. ღონისძიებას ასევე საკანონმდებლო ორგანოს, სასამართლო სისტემის, პოლიტიკური პარტიების, საერთაშორისო ორგანიზაციებისა და სამოქალაქო სექტორის წარმომადგენლები ესწრებოდნენ.