დღეს თბილისსა და 25 მუნიციპალიტეტში საარჩევნო განვითარების სკოლების წარმატებულ კურსდამთავრებულებს სერტიფიკატები გადაეცათ. ცენტრალურ საარჩევნო კომისიაში (ცესკო) გამართულ ღონისძიებაზე  ახალგაზრდებს, რომლებმაც თბილისში გაიარეს სასწავლო კურსი, სერტიფიკატები ცესკოს თავმჯდომარე თამარ ჟვანიამ გადასცა და სკოლის წარმატებით დასრულება მიულოცა.

„ვფიქრობ, თემები, რომელიც საარჩევნო განვითარების სკოლაში თქვენ განიხილეთ და ერთობლივად გაიარეთ, ქვეყნის სამომავლო განვითარებისთვის არის მნიშვნელოვანი. ამ სკოლის ერთ-ერთი მიზანი სწორედ ისაა, რომ ახალგაზრდები, ჩვენი კურსდამთავრებულები იყოთ აქტიური, ამ ქვეყნის განვითარებაზე ორიენტირებული მოქალაქეები და გქონდეთ მინიმუმ ის მოტივაცია, რაც ამ სკოლის ერთ-ერთი მნიშვნელოვანი მიზანია, რომ  არჩევნებში მონაწილეობა მიიღოთ.  არჩევნები არის მნიშვნელოვანი ნაბიჯი, რომლითაც იწყება ქვეყნის მომავალი პოლიტიკური განვითარება და დარწმუნებული ვარ, რომ თქვენ იქნებით ამ ძალიან მნიშვნელოვანი პროცესის ნაწილი“, აღნიშნა თამარ ჟვანიამ კურსდამთავრებულებთან შეხვედრისას.

10 დღიანი სასწავლო კურსი „საარჩევნო განვითარების სკოლაში“ 18-24 წლის ახალგაზრდებმა გაიარეს. სასწავლო პროგრამა მოიცავდა შემდეგ საკითხებს: საარჩევნო სისტემები, საარჩევნო ადმინისტრაციის საქმიანობის ასპექტები, 1919 წლის დამფუძნებელი კრების არჩევნები, ინფორმაცია დემოკრატიული საარჩევნო პრინციპების, საქართველოში არსებული არჩევითი ორგანოების, არჩევნებში ჩართული მხარეების, გენდერული თანასწორობის, არჩევნების გამჭვირვალობისა და ხელმისაწვდომობის შესახებ. ტრენინგებს ახალგარზდებისთვის საოლქო საარჩევნო კომისიების წევრები ატარებდნენ.

საგანმანათლებლო პროექტი „საარჩევნო განვითარების სკოლა“ წელს უკვე მეხუთედ განხორციელდა. საპილოტე პროექტი 10 მუნიციპალიტეტში დაიწყო და მას შემდეგ სკოლების რაოდენობა ყოველწლიურად იზრდება. წელს უკვე სწავლება თბილისსა და 25 მუნიციპალიტეტში: გურჯაანში, სიღნაღში, თელავში, ახმეტაში, რუსთავში, გარდაბანში, მარნეულში, დუშეთში, ახალგორში (წეროვანი, დევნილთა დასახლება), გორში, ხაშურში, ბორჯომში, ახალციხეში, ამბროლაურში, საჩხერეში, ზესტაფონში, სამტრედიაში, ხონში, ქუთაისში, ოზურგეთში, სენაკში, ზუგდიდში, ფოთში, ბათუმსა და ქობულეთში ჩატარდა.

პროექტს ცესკო და სწავლების ცენტრი, საარჩევნო სისტემების საერთაშორისო ფონდთან (IFES) თანამშრომლობით და ევროპის საბჭოს (CoE) მხარდაჭერით ახორციელებს.