საპარლამენტო სწავლების საერთაშორისო ცენტრის (ICPS) მიწვევით, ცენტრალური საარჩევნო კომისიის თავმჯდომარის მოადგილე გიორგი შარაბიძემ და ცესკოს სწავლების ცენტრის დირექტორის მოადგილე ნინო ბერულავამ საარჩევნო საკითხთა მე-18 საერთაშორისო სიმპოზიუმში მიიღეს მონაწილეობა. ღონისძიება მალდივის რესპუბლიკაში გაიმართა.
საერთაშორისო სიმპოზიუმზე მხარეებმა მნიშვნელოვანი საარჩევნო საკითხები განიხილეს. მათ არსებულ გამოწვევებზე, მიმდინარე პროექტებზე, ასევე სხვადასხვა მიმართულებით, საუკეთესო პრაქტიკის დანერგვაზე იმსჯელეს. განხილვის მთავარი თემები იყო - ამომრჩევლის უფლებები, უმცირესობათა უფლებები, საარჩევნო პროცესში ჩართულ მხარეებთან თანამშრომლობის საუკეთესო პრაქტიკა, ბრძოლა დეზინფორმაციასთან, ასევე სოციალური მედიის მიმართულებით არსებული გამოწვევები.
ღონისძიებაში სხვადასხვა ქვეყნის საარჩევნო ადმინისტრაციების, საერთაშორისო ორგანიზაციებისა და აკადემიური წრეების წარმომადგენლებმა, ასევე საერთაშორისო ექსპერტებმა და ევროპის ქვეყნების პარლამენტის წევრებმა მიიღეს მონაწილეობა. სიმპოზიუმი საპარლამენტო სწავლებების საერთაშორისო ცენტრისა (ICPS) და მალდივის რესპუბლიკის საარჩევნო ადმინისტრაციის ორგანიზებით, 2019 წლის 3 ივლისიდან 5 ივლისის ჩათვლით მიმდინარეობდა.
