„არჩევნებში მონაწილეობა და განათლება დემოკრატიისთვის“ - ამ სახელწოდების სამუშაო შეხვედრაში მიიღეს მონაწილეობა საარჩევნო ადმინისტრაციის წარმომადგენლებმა რუმინეთში, ქალაქ სინაიში.

სამუშაო შეხვედრაში, სადაც ცესკოს საზოგადოებასთან ურთიერთობის განყოფილების უფროსი ქეთევან ჯანელიძე და ცესკოს სწავლების ცენტრის სასწავლო პროგრამების განყოფილების უფროსი მაია გუდაძე მონაწილეობდნენ, რამდენიმე მნიშვნელოვანი საკითხი განიხილეს. მხარეებმა იმსჯელეს გლობალურ გამოწვევებზე, ამომრჩეველთა აქტივობის ზრდაზე და მათ ჩართულობაზე საარჩევნო პროცესებში. საუბარი შეეხო ამომრჩეველთა აქტივობის გაზრდის ეფექტურ მეთოდებს. მონაწილეებმა განიხილეს, რა მეთოდების გამოყენებაა შესაძლებელი ამ კუთხით გარდამავალი დემოკრატიის ქვეყნებში. შეხვედრის ფარგლებში ასევე იმსჯელეს სოციალური მედიის როლზე საარჩევნო პროცესებში.

ცესკოს და სწავლების ცენტრის წარმომადგენლებმა ქალაქ სინაიში, ასევე მიიღეს მონაწილეობა ფრანკოფონიის საარჩევნო ადმინისტრაციების ქსელის (RECEF) მეშვიდე გენერალურ ასამბლეაში, სადაც გაიმართა დისკუსია ამომრჩეველთა უფლებებისა და მათი საარჩევნო პროცესში ჩართულობის შესახებ. შეხვედრის ფარგლებში ასევე საუბარი შეეხო ევროპარლამენტის არჩევნებს.

სამუშაო შეხვედრებს ორგანიზება გაუწია რუმინეთის მუდმივმა საარჩევნო კომისიამ ფრანკოფონიის საარჩევნო ადმინისტრაციების ქსელთან (RECEF) თანამშრომლობით. ცესკოს წარმომადგენლები ქალაქ სინაიში 5 ივნისიდან 8 ივნისის ჩათვლით იმყოფებოდნენ.