2019 წლის 17 მაისს დასრულდა საინფორმაციო-სასწავლო კურსი „არჩევნები და ახალგაზრდა ამომრჩეველი“. ცესკომ და სწავლების ცენტრმა აღნიშნული სასწავლო პროგრამა 64 მუნიციპალიტეტში განლაგებულ 145 საჯარო სკოლაში განახორციელა.

წელს საინფორმაციო-სასწავლო კურსი საჯარო სკოლების XI-XII კლასის 2763-მა მოსწავლემ გაირა, რომლებსაც შესაბამისი სერტიფიკატები გადაეცათ. პროგრამის ფარგლებში მონაწილეები გაეცნენ ისეთ მნიშვნელოვან საკითხებს, როგორიცაა: არჩევნების ისტორიული ექსკურსი და თანამედროვეობა, არჩევნები და დემოკრატია, არჩევნების ჩატარების ძირითადი პრინციპები და საერთაშორისო სტანდარტები, გენდერული თანასწორობა, საარჩევნო ადმინისტრაცია და ამომრჩეველი, არჩევნებში ჩართული სხვა მხარეები. სასწავლო პროგრამის ფარგლებში ახალგაზრდების მონაწილეობით მოეწყო დებატები. აღნიშნული კომპონენტი წარმოადგენს სიახლეს სასწავლო პროგრამაში და მიზნად ისახავს მოსწავლეებისთვის დებატების კულტურის განვითარების ხელშეწყობას.

კურსის ბოლოს მოსწავლეებმა ჩაატარეს იმიტირებული არჩევნები, რომლის პირობებშიც გამოვლინდა გარემოს დაცვასთან დაკავშირებული საკითხების პოპულარიზაციის მიმართულებით თავად მოსწავლეების მიერ შემუშავებული სლოგანებიდან გამარჯვებული სლოგანი.

ცესკო და სწავლების ცენტრი აღნიშნულ პროექტს საქართველოს განათლების, მეცნიერების,  კულტურისა და სპორტის სამინისტროსთან თანამშრომლობით 2015 წლიდან ახორციელებს, რაც მიზნად ისახავს ახალგაზრდების საარჩევნო ცნობიერების ამაღლებას და სამოქალაქო პასუხისმგებლობის ზრდის ხელშეწყობას. დღემდე საინფორმაციო-სასწავლო კურსი „არჩევნები და ახალგაზრდა ამომრჩეველი“ 494 საჯარო სკოლის 8560- ზე მეტმა მოსწავლემ გაიარა.