ცესკომ და სწავლების ცენტრმა 2019 წლის 6 მაისიდან დაიწყო საინფორმაციო-სასწავლო კურსი „არჩევნები და ახალგაზრდა ამომრჩეველი“ საჯარო სკოლების XI-XII კლასის მოსწავლეებისათვის. პროგრამა საქართველოს 64 მუნიციპალიტეტში განლაგებულ 145 საჯარო სკოლაში განხორციელდება.

აღნიშნული ინიციატივა მიზნად ისახავს ახალგაზრდების საარჩევნო ცნობიერების ამაღლებას და სამოქალაქო პასუხისმგებლობის ზრდის ხელშეწყობას. სწავლების ცენტრის მიერ შემუშავებული კონცეფციის შესაბამისად, სასწავლო პროგრამაში გამოყენებული პრაქტიკული სწავლების ფორმატში საჯარო სკოლების მოსწავლეები ისეთ მნიშვნელოვან საკითხებს შეისწავლიან, როგორიცაა: არჩევნების ისტორიული ექსკურსი და თანამედროვეობა, არჩევნები და დემოკრატია, არჩევნების ჩატარების ძირითადი პრინციპები და საერთაშორისო სტანდარტები, გენდერული თანასწორობა, საარჩევნო ადმინისტრაცია და ამომრჩეველი, არჩევნებში ჩართული სხვა მხარეები. სასწავლო პროგრამა ასევე ითვალისწინებს ახალგაზრდების მონაწილეობით დებატების მოწყობას. აღნიშნული კომპონენტი წარმოადგენს სიახლეს სასწავლო პროგრამაში და მიზნად ისახავს მოსწავლეებისთვის დებატების კულტურის განვითარების ხელშეწყობას.

კურსის ბოლოს მოსწავლეები იმიტირებულ არჩევნებს ჩაატარებენ, რომლის პირობებშიც გამოვლინდება თავად მოსწავლეების მიერ გარემოს დაცვასთან დაკავშირებული საკითხების პოპულარიზაციის მიმართულებით შემუშავებული სლოგანებიდან გამარჯვებული სლოგანი.

ცესკო და სწავლების ცენტრი აღნიშნულ პროექტს საქართველოს განათლების, მეცნიერების, კულტურისა და სპორტის სამინისტროსთან თანამშრომლობით 2015 წლიდან ახორციელებს.

საინფორმაციო-სასწავლო კურსი 6 – 17 მაისის პერიოდში ეტაპობრივად განხორციელდება (I ეტაპი: 6-10 მაისი; II ეტაპი: 13-17 მაისი). სასწავლო პროექტის განხორციელებას სწავლების ცენტრის მიერ გადამზადებული 111 ტრენერი უზრუნველყოფს.

იხილეთ I ეტაპის გრაფიკი.