2019 წლის 20 აპრილს სწავლების ცენტრმა და ცესკოს იურიდიულმა დეპარტამენტმა ჩაატარა საინფორმაციო შეხვედრა 19 მაისის შუალედურ/რიგგარეშე არჩევნებში ჩართული საოლქო საარჩევნო კომისიების ხელმძღვანელი პირებისა და იურისტებისთვის. აღნიშნული ინიციატივა მიზნად ისახავს საოლქო საარჩევნო კომისიების საარჩევნო დავებთან დაკავშირებული ადმინისტრაციული წარმოების შესაძლებლობების გაძლიერებას, რაც საერთაშორისო და ადგილობრივი სადამკვირვებლო ორგანიზაციების ანგარიშებში ასახულ რეკომენდაციებს ეხმიანება.
სამუშაო შეხვედრა სწავლების ცენტრის დირექტორმა ნათია ზაალიშვილმა და ცესკოს იურიდიული დეპარტამენტის უფროსმა გიორგი ძაგანიამ გახსნეს, რომლებმაც არჩევნების მაღალპროფესიულ დონეზე ჩატარების უზრუნველსაყოფად საოლქო საარჩევნო კომისიების მიერ საქმიანობის კვალიფიციურად და ეფექტიანად წარმართვის მნიშვნელობაზე გაამახვილეს ყურადღება. შეხვედრას ასევე ცესკოს წევრები არჩილ ანასაშვილი და გიორგი ჭიქაბერიძე ესწრებოდნენ.
მონაწილეებმა საარჩევნო დავებთან დაკავშირებით სხვადასხვა მნიშვნელოვანი საკითხი განიხილეს, მათ შორის: კენჭისყრის დღის განცხადებებთან/საჩივრებთან დაკავშირებული ადმინისტრაციული წარმოების დაწყება; საოლქო საარჩევნო კომისიის მიერ გადაწყვეტილების მიღება განცხადებებზე/საჩივრებზე; საოლქო საარჩევნო კომისიის სხდომის ორგანიზება; გადაწყვეტილების მომზადება ადმინისტრაციულ სამართალდარღვევებთან დაკავშირებით. მონაწილეები ასევე გაეცნენ 2018 წლის არჩევნებზე საოლქო საარჩევნო კომისიების მიერ გამოცემული სამართლებრივი აქტების ანალიზის შედეგებს და მიიღეს შესაბამისი რეკომენდაციები.
